Online Reporter
BANENGI abafowethu abathi beqeda ukubhala izifundo zezinga le-O-level bahle bathwale imitshaqana yabo babhekise amabombo eGoli.
Abanye lempumela yemihloliso kabayilindi kumbe bayabe besazi ukuthi ababhalanga lutho baxakaxile. Abanye njalo ngabathi abazali abasenelisi ukubabhadalela imali zesikolo, bacaphuke babone kungcono ukuwela uNgulukudela loba ethwele izigodo engaphefumuli.
Isikhathi esinengi bahamba bebancane bafike bathatheke khonale mhlawumbe sokubangelwa yikuthi ngale kuphilwa ubusanasana umtshado wezinja. Lizezwa nje sokuthiwa uZibani banyana uselomfazi ongaziwayo ekhaya, lalapho nxa kusiza amakhefu afana leleKhisimusi lePhasika imvama kubuya indoda, umalukazana sitshengiswe izithombe zakhe kumakhalekhukhwini.
Abanye omalukazana bakhona uhle uyifunde ivaliwe ukuthi umfana utheze olulenkume ngendlela ayabe egqoke ngayo, isibhono siphandle sifakwe amacici lekhala libhotshoziwe lafakwa icici, amazinyo ececiswe ngegolide ngapha eqolo edwetshwa-dwetshiwe ama-tattoo etsholobela esiya khonale.
Lembala uthole eyimidwebudwebu sekungani ngumbala wenkunzi yomziki. Khonapho uyabe egqoke isigcebhezana. Ngikhumbula omunye engake ngamtshengiswa ehlezi phansi ngahle ngazibonela ukuthi loba sekuthiwa ubabazala ukhatshana akula mfazi opheleleyo ongahlala ngaleyo ndlela axamalaze inyawo okwekhehla elothamele ilanga edwaleni.
Inengi labo abalugxobi emakhaya abomkabo, abanye size sibabone nxa sekuthe kwaba lomonakalo indoda isifile sesitshengiswa labantwana asebekhulile, abanye bavele bathi nxa kutshona bavele bangafuni sihlobo sendoda eduze besenzela ukuphuca yonke impahla kamufi abuye ekhaya eyisidumbu kungela ngitsho loTshangani bag olemitshaqana yakhe asuka layo ekhaya.
Ngikhumbula sathi silanda isidumbu somunye ujaha kamakhelwane sathola ethuthile engaziwa lalapho athuthele khona lathi saswela ukuthi sizamdinga kobani njengoba iGoli inkulu kangaka. Saqonda lapho okwakusebenza khona ujaha sathola ukuthi umkakhe wahle wayakhona wathatha yonke imali, legazi likamufi lingakanqumi wadliwa ngumswenya kwacina kuthengiswa inkomo ukuthi sithole imali yokubuya lesidumbu ekhaya. Ayixabene.
