Online Reporter
Fungai Muderere
UDABA oluhlezi lusemahlombe enkokheli zeHighlanders ngolwesikhwama semali.
Kusukela kudala, iHighlanders iphethe isikhalazo sokusilela kwemali, ngakho kukhangelelwe ukuthi lokhu kube ludaba olusegudwini kumhlangano wamalunga uqobo, ozaqhutshwa mhlaka 25 Zibandlela, eClub House.
Umhlangano lo uzaqalisa ngehola lesitshiya galolunye ekuseni ngokutsho kombiko othunyelwe ekuqaleni kwaliviki.
Amehlo amalunga eqembu azakuthi nhlo kumgciningcebo uNkani Khoza lomgcinisihlalo uKenneth Mhlophe okumele banikeze imbiko ecacayo mayelana lesimo sesikhwama semali yeqembu.
Ngesizini edluleyo, iBosso iqede umnyaka isadalala, isehluleka ukuhlanganisa imali zendleko ezitshiyeneyo, kulamahungahunga okungasetshenziswa kwemali.
Kumasizini adluleyo, iqembu lehluleke ukuveza incwadi ezifaneleyo zokusetshenziswa kwemali, okwaba yisitshengiselo sokuthi kukhona okutshaya amanzi eqenijini.
Okunye okumunyethwe kunhlelo zomhlangano yikwamukela umbiko kamgcinisihlalo, owebhodi lokumiswa kwesisekelo sombuso weqembu.
Kujwayelekile ukuthi amalunga aphiwe umbiko ongasuthisekiyo, osekudale insolo. Ukusilela kwemali lokhu kumangalisa abalandeli ngenxa yokuthi bayazibuza ukuthi kungani kunjalo, nanko abantu bahlala begcwalisa inkundla.
Losomabhizimusi uWicknell Chivayo kunye labanye abaxhasi sebephosele imali ecacayo eqenjini.
Ukuqhutshwa komhlangano lokhu kuza ngesikhathi iHighlanders isitshintshe ithimba layo labaqeqetshi, ngokuqhatsha umqeqetshi uThabo Senong.
IBosso yacina ukuthatha isicoco seligi ephakemeyo ngo2006, ngakho abalandeli bazafuna ukuzwa emhlanganweni ukuthi lonyaka kuhlosweni kulokho.
