marble nkomo
YiNtatheli kaMthunywa
ZIDIDEKILE izakhamizi ngokwenzakala phakathi komunye umuzi elokitshini leCowdray Park nanko phela kulenina okubikwa selifuna ukuqeda umuzi walo ngokuwudiliza ngezandla zalo, isenzo esenza abantu bacabange ukuba aliphilanga kuhle engqondweni.
Kunengi osokwenzakele phakathi kwalumuzi kodwa izakhamizi zithi yiloba zike zabikela amapholisa ngalimpicabadala akukho osokwenziwe okukhombisa ukuba abantu abahlala kulindlu bangathola usizo kumbe lokuthi izakhamizi lazo zithole ukuhlaliseka ngalindaba.
Abahlali balindawo bathi kukhona okunuka santungwana ngalindaba, bathi abantu abahlala kulindlu kukhanya babili. Kulenina eselikhulile kanye lendodakazi yalo le ebonakala ikhanda indlu idiliza yonke into lapho ekhaya.
Akula owazi lutho ngabantu laba ababili. Akwaziwa ukuthi amabizo kanye lesibongo sabo ngesakobani njalo lokuthi baphila njani ngoba kukhanya abaphilisani kumbe ukukhulumisana labanye abantu, benza okwabo bodwa.
Intatheli zivakatshele lindawo zafika zaxoxisana lezakhamizi ezibike ukuba lazo zilokhu zididekile ngale indaba.
Okhulume lentatheli oziveze ngokuthi nguNqobile Moyo ubike ukuba inina leli seligebhe amagodi esabekayo egumeni lalo.
“Indaba le lathi iyasisinda, asazi ukuthi kwenzakalani. Sesize sihlalela evalweni ngoba asazi okungenzakala nxa inina leli lingaphuma kwelalo iguma lize kweyethu imizi.
“Umama lo osekhanda indlu yakhe kubikwa wayehlala emazweni, eUnited Kingdom lapho ayesebenza khona nje eziphilele njengaye wonke umuntu. Waphenduka ekhaya ezohlala endlini yakhe le aseyibhidliza. Sebeleminyaka behlala lonina lapha, asikaze sibone sihlobo sabo njalo abakhulumi lomuntu, batshona bevale igedi labo. Akulamuntu ongena khona.
“Sinje lathi izibongo kumbe amabizo asiwazi ngoba abayi ebantwini njalo abakhulumi lomuntu.
“Umama lo kuthiwa waqala ngokugebha inkalakatha zamagodi okokuthi uyangena phakathi kwalo ucwile okwenza abantu bacina benanzelela ukuba kukhona osokutshaya amanzi.
“Waqala-ke ukukhanda indlu ngesando wadinga into yokukhwela wakhipha ama air vents wonke endlini, khathesi kubizwa amapholisa besekusele ukuthi indlu ayiwise elokhu ezama ukuyidiliza. Ukuthi uhlupho lungaphi lathi asazi, iyindida lindaba.
“Unina laye uyabe ethule ekhangele umntwana esona ukuthi abuye ebantwini azocela usizo kaqali,” kubika uMnu Moyo.
Omunye wabahlali balapha ongathandanga ukuveza igama lakhe ubike ukuba indlu le ingabe ilemikhoba esebenzisa umntwana.
Uthe inina leli lathi liqeda ukugebha amagodi amakhulu egumeni laseliqala ukwethula ama-satellite dish lithatha impahla esendlini efana lemibheda lamasofa litshisa.
“Angiboni ukuthi kuseselolutho endlini leya. Inina leli lathi liqeda ukugebha amagodi amakhulu egumeni lalandela ngokuthatha impahla endlini efana lemibheda lamasofa litshisa.
“Akulamuntu osowake wangena kulowa muzi njalo asikaze sibone bevakatshelwa ngumuntu, bahlala bezivalele nje,” kutsho isakhamuzi lesi.
Siqhubeke sathi abantu abake bangena endlini babona ukuthi ngempela akusela lutho ngabangena lamapholisa ngesikhathi efika ngemva kokuba izakhamizi seziwabizile.
“Abangena endlini le lamapholisa bathi akuselalutho umama lwana useqede yonke impahla etshisa kumbe ebulala. Khathesi usefuna ukuqeda indlu ngokukhanda imiduli ngesando.
“Ngelanga amapholisa efika lapho kuthiwa athatha inina leli lomama walo ahamba labo kodwa ngemva kwesikhatshana basebephendukile, akula owaziyo okwenzakalayo khonangale.
“Kukhona okutshaya amanzi laphana. Asiboni ukuthi baphilile engqondweni abantu laba. Ngabe abomthetho bayabathatha bayekhangelwa, mhlawumbe abasaphilanga ekhanda,” kubika isakhamuzi lesi. Intatheli ixhumane loKhansila weCowdray Park uMnumzana Ashton Mhlanga obike ukuba isimo sale imuli sinzima kakhulu.
“Okwenzakala kuleyana indlu kubuhlungu kuzwisa ubuhlungu kakhulu. Ngike ngahamba lami ngayafika ngazibonela ngawami amehlo, kubuhlungu. Sacela ukuba abeSocial Welfare bancedise ukuba babone ukuba abantu labana bangasizakala njani asikatholi mpendulo ebambekayo kodwa ngizalandelela ngizwe ukuba udaba lwakhona luhamba njani njalo ngizaxoxisana lommeli wedale lePhalamende kubonakale ukuba kungenziwani,” kuphetha uMnu Mhlanga.
Online Reporter