admin
Ethel Ncube
KUSEHLAKALO esidida ababalisi, abafundi kunye labazali besinye isikolo esikuWadi 12 eGwanda kubikwa amakilasi onke avuka phose nsukuzonke egcwele ingcekeza yangaphandle yomuntu.
Isiga lesi esesilesikhathi sisenzakala esikolo sePelele Primary kubikwa sesinyampisa ababalisi inhliziyo ngoba besazi ukuthi nsukuzonke nxa befika esikolo kumele baqale basuse ingcekeza le.
UMthunywa uzwe ngabafakazi abaqotho ukuthi phose amakilasi wonke asesikolo lesi avuka engakhangeleki ngengcekeza le.
Omunye umzali olomntwana ofunda esikolo lesi othande ukwaziwa ngokuthi nguMaDube nje kuphela uthe okwenzakala esikolo lesi sokubadida ingqondo ngoba kabasazi ukuthi yikwenza komuntu kumbe ngokunye abangakuzwisisiyo.
“Lokhu okwenzakalayo kunzima ngoba abantwabethu yibo ababutha ingcekeza le emakilasini. Lokhu kulakho ukuthi kubaphe umnyama.
“Mhlawumbe sekumele kubizwe umhlangano ukuze kukhulunywe ngendaba le ngoba hayi lathi abazali sokusikhathaza sibili lokhu okwenzakala esikolo sethu,” kuchasisa uMaDube.
“Engxenye emhlanganweni kungaphuma isisombululo sokuba kungenziwani ukuze ababalisi labantwana basizakale baphume enkingeni yokuvukela ukuyabona ingcekeza emakilasini.
“Kulomunye umbalisi engike ngaba laye ngoLwesine kuviki ephelileyo laye okufakazileyo ukuthi uthole ekilasini yakhe kungcwele ingcekeza yangaphandle,” kutsho uMaDube.
Intatheli ixhumane loProvincial Education Director wesabelweni seMatabeleland South uNkosikazi Beatrice Manjere oveze ukuthi abakezwa ngalokho.
“Indaba le ayikafiki kithi emahofisini mhlawumbe isendleleni,” kuphetha uNkkz Manjere.
Online Reporter