admin
Ethel Ncube
ZISATSHWAQE umzimba izakhamizi zesiqintini seMandate eBeitbridge kulandela ukuzwa ngesehlakalo lapho enye indoda eleminyaka engu-26 okubikwa idobhe ibhomba egangeni andubana ifike emzini wayo izame ukulivula lendodana yalo okubangele ukuthi lidubuke libabulale bobabili.
Ukuqhuma kwebhomba leli, mhlaka 11 Lwezi kwethuse izakhamizi zesigabeni esingaphansi kwenduna uMatibe okwenze zaphanga zaqonda lapho okuvelele khona umsindo lo zafica uRealise Mpofu (26) lendodana yakhe, uTsepo Mpofu (7) sebedlule emhlabeni.
Kuzwakale ukuba uMpofu wathi efika ngekhaya lebhomba leli ayelidobhile, wathatha ipintshisi wazama ukulivula okuyikho okwabangela ukuthi lidubuke limtshaye unyawo lesandla wahle wedlula laphinda lalimaza lendodana yakhe ayelayo.
Ekhuluma lentatheli omunye umfakazi wakule indawo ongathandanga ukuqajwa ngebizo uchaze ukuba okwenzakale koMpofu kwethuse isigaba sonke.
“UMpofu kukhanya wadobha ibhomba leli egangeni engazi ukuthi libhomba. Uthe efika ngekhaya wathatha ipintshisi efuna ukubona ukuthi kulani phakathi yikho lapho athi elivula lahle ladubuka lamtshaya unyawo lesandla kukanti umntanakhe ayelaye khonapho laye lahle lamtshaya.
“Bahle babhubha bobabili. Omunye njalo umntakaMpofu oyinkazana owayeme bucwadlana labo yena wasila ekufeni loba waba lamanxeba,” kuchaza umfakazi lo.
Isikhulumi samapholisa elizweni uAssistant Commisioner Paul Nyathi uqinisekisile ukuthi udaba lolu balwamukela.
“Sichwayisisa udaba lapho uRealise Mpofu adobha isikhali esingaziwayo wahamba laso ngekhaya wasivula ekusivuleni kwakhe sadubuka kwafa yena, lomntwana ongumfana kukanti oyinkazana walimala kakhulu wathwalelwa esibhedlela.
“Sikhuthaza uzulu ukuba angadobhi lutho angalwaziyo njalo angazami ukuluvula engazi ukuthi kuyini?’ kuphetha Asst Comm Nyathi.
Online Reporter