Online Reporter
SEKUQUBUKE indida ngowesifazane okuthiwa utshayeke phansi, watshona eyokwenza izinto “eziphathelene lesintu” eNanda Dam eSouth Africa ngoMvulo kuyonale iviki.
Umphakathi labantu abakhele duzane laleli damu basakhathazekile ngento abayibone izolo owesifazane, ogama lakhe nguNkosazana Zama Sabela, weNazareth ePinetown, etshayeka phansi watshona eyogeza emfuleni, esenza lezinto “zesintu” njengoba kuthiwa ubephethe inkukhu ezimbili, amakhandlela lokunye okuphathelene lalokhu abeyokwenza kulelidamu.
Kubikwa ukuthi kubizwe amapholisa endaweni yesehlakalo kulandela lesi sehlakalo. Ngokuthola kwentatheli, umufi ubehamba lomakhelwane wakhe ngesikhathi esiyageza kuleli damu.
Kuthiwa uqale wangena emanzini wageza, wabe esenatha amanzi okuthe kusenjalo, wabe esetshayeka phansi, watshona.
Intatheli iyibonile ividiyo lapho owesifazane ongumakhelwane ephekwa ngemibuzo ngamalunga omphakathi, echaza ukuthi ngempela umufi umtshele ukuthi ubeyokwenza into ephathelene lokuthwala ngoba efuna ukuceba.
UNkosazana Winnie Miya uveze ukuthi ubecelwe ngumufi ukuba amphelezele ayogeza kuleli damu.
Uthi uqale enganaki lutho kodwa kuthe uma esebona izinto abeziphethe, okubalwa kuzo inkukhu ezimbili, waqala wabuzisisa ukuthi kuyokwenziwani.
“Ngithe uma ngibuza, wangitshela ukuthi uyothwala, kodwa ngangakunaki lokho. Sithe uma sifika emfuleni, wangena phakathi. Uphumile wabe esenatha amanzi, akuphelanga isikhathi esingakanani wabe esiwa, wakhihliza amagwebu, kwabe sekuwukuthula kwakhe lokho,” kutsho yena.
Uveze ukuthi zikhona ezinye izinto abebeziphethe okubalwa lempahla lamabhodo. Uthi kalaso isiqiniseko sokuthi abekwenzwa ubesizwa ngubani njengoba ebengakaze amtshele lutho phambilini.
Okhulumela amapholisa eKwaZulu-Natal uSergeant Thenjiswa Ngcobo uthe amapholisa avule idokethi ngokufa komuntu. —Ilanga
