Indlela amadlozi ayelahliswa ngayo izolo

Sagiya Ngoludala

Indlela amadlozi ayelahliswa ngayo izolo

KWAKUKUHLE endulo kubuswa kudelwa amajaha ekhula aze abe ngamakhehla amxhiliba. Lapha ke babesaphila kamnandi abantu besidlani ebabayo kambe, icala bengaliboni belizwela kubafana bembuzi.

Ngalesisikhathi wawungeke uzwe kuthiwa umuntu uhlutshwa ngamadlozi kumbe eminye imikhuhlane eyehlukeneyo. Konke lokhu babekulahlisa abadala kungaphindi kuphenduke futhi.

Ukulahliswa lokhu kwakusenziwa ngendlela ezehlukeneyo kusiya ngokuthi ngubani okwenzayo njalo wazi ukukwenza ngaluphi uhlobo. Noma kunjalo isiphetho kwakuzabe sokulahlisiwe kuphela.

Kukhona njalo abantu ababekhula behlutshwa ngamadlozi ngapho bengafuni ukuyawavusa. Amadlozi la ayebonakala ngokugula komuntu kumbe ukuhlala ephupha izinyoka mihla yonke. Ukuphupha izinyoka lokhu akuthandabuzeki ukuthi uyabe ulamadlozi kumbe kukhona umuntu ofuna ukukujikela amadlozi amabi azakuphazamisa empilweni.

Lapha lokhu ke kwakukhulunyelwa ngabadala ukuze kulahliswe. Abadala babemthatha umuntu onjalo ahambe esihlahleni esifana labathethela kiso kodwa hatshi esithethelweni sakibo abasisebenzisayo. Lesi sihlahla kungaba ngumganu nxa kuyikuthi ngesiko labo bathethelela emganwini kodwa akungabi yilowo abathethela kiwo njengomdeni.

Lapha bazafika bakhulume labaphansi kusekuseni kumbe ntambama bebathelela amalalangwenya kulesisihlahla kumbe utshwala bebazisa ngokuthi umntwana lo abaze laye uhlutshwa yizinyoka.

Amazwi ayekhulunywa lapha yilawa, “Bogogo labokhulu nangu umntwana uZibani (bemqamba ngegama) uhlutshwa yizinyoka ebuthongweni sicela zisale lapha lamhlanje umntwana usahamba uzaphenduka ezozithatha kwelizayo….” Babesenza lokhu baqede lapho batshiye umganu wesikhuni lo olamanzi kumbe utshwala kanye lobuhlalu abayabe bebukhiphe kulo ozalahliswa amadlozi la.

Ngemva kwalokho bazasuka balubhekise ekhaya benganyemukuli baze bayefika. Ozanyemukula amadlozi la azalandela yena ngoba kukholelwa ukuthi iziphundu zabo kazaziwa emadlozini ngoba kaziboni. Yikho phela kwakuthiwe siphundu kawuboni.

Kuzathi mhla lowo olahlise amadlozi la esewafuna abuyele njalo labadala bayethatha umganu lo bawabikele ukuthi sebezowathatha. Ekuwathatheni lapha kuzafanela ahle ayevuswa ngoba engamhlupha. Nxa kuyikuthi uwalahlise okwempilo yakhe yonke akufanelanga abuyele kuleyondawo aze ayekufa.

Ngalokhu amadlozi la azaqoma njalo omunye emulini ngoba engaselawo amandla okubuyela kulowo owawalahlisayo njengoba wawatshela ukuthi usahamba.

Uhlupho yikuthi kungaba khona omunye owalo umdeni ozadlula ethinta umganu lo amadlozi la azalandela yena amhluphe sibili. Lapha kwakube nzima ukuthi alahliswe ahlale kodwa ayabe ethi engalahliswa ayevuka komunye olilunga lomdeni njengoba ezabe esekhathele ukuhlala egangeni.

Yikho phela kwakukhuthazwa umdeni ukuthi ungadluli ngaphansi kwesihlahla sesithethelo kungakhathalekile ukuthi sikuyiphi indawo ngoba kungenzeka kuleso sihlahla kube kukhona amadlozi amabi alo umdeni alahliselwa khona. Kwakunjalo endulo.