Online Reporter
Nkosilathi Sibanda
KULANDELA ukuba yintshantshu yemidlalo yeZone Six, iqembu lelizwe ele-handball U20 selilungiselela uhambo lokuyadlala kuma-African Championships, ngokutsho kwenkokheli zeZimbabwe Handball Federation (ZHF).
Imidlalo yama-African Championship izaqhutshelwa e-Ivory Coast ngoMpandula. Ukuphatheka kwelizwe kumidlalo le kulethe injabulo ngoba iqembu lacina ukufika kunkundla le ngo2024.
IZimbabwe ithole ithuba lokuncintisa kulelibanga lomdlalo kulandela ukuba yintshantshu, ithola imendulo yegolide ku-2026 Internationa Handball Federation Trophy Africa Zone VI edolobheni leLusaka, eZambia.
IZimbabwe yanqoba iMozambique 36-32 kumdlalo wokucina, ngeviki edluleyo.
Iqembu lama-U20 lakuleli, selibe yintshantshu yeZone Six kathathu.
Ekhuluma lentatheli yephephandaba likazulu ngoLwesibili kuliviki, umqondisi wezokuqeqetsha kunhlanganiso yeZHF uBekezela Ncube uthe imizamo yabo yokuthuthukisa umdlalo isikhanya.
“Lesi yisitshengiselo semisebenzi esiyenzayo ekuphakamiseni umdlalo we-handball elizweni. Sibatshayela izandla ngokuphumelela ukuya kuma-African Championships,” kutsho uNcube.
“Akulula ukuthi ube yintshantshu kathathu iminyaka ilandelana. Basebenzile abafana. Okuseleyo yikuqina ngokulungiselela ama-African Championships azayo. Kungabe kukhanya angathi asesekhatshana kodwa sizaqala khathesi ukulungiselela.”
UNcube, owake wabangumdlali ozwayo, uthe kulesidingo sokuqalisa amalungiselelo masinyane, ngendlela ehlelekileyo ukuze kuthuthukiswe ukuncintisa ezingeni eliphezulu lokuthi abadlali bahlale beqinile.
“Kumele sithathele lapho esitshiye khona. Umdlalo esawutshengisa eZambia kumele wahlukane lalo esizawutshengisa eCôte d’Ivoire.
“Inhloso yethu enkulu yikuqalisa amalungiselelo kuselesikhathi lokugcina iqembu lihlangene. Ngokugcina abadlali behlangene kuzenza kubelula ukuthi siyethule umdlalo ophezulu.”
