Sibonokuhle Mboni
INDLOVU Iyanyathela FC isiphambili ngemiklomelo eyisikhombisa kuDivision 2 ngemva kokwehlula iSaint Daniel’s FC nge-4-2, eHQ 1 Infantry Brigade ngoMgqibelo.
Indlovu Iyanyathela isinqobe imidlalo engu-20 yanqotshwa emibili, okuyenza ibe lemiklomelo engu-61.
IMainline yiyo elandela iNdlovu Iyanyathela ngemiklomelo engu-54, ikanti iMawabeni ingeyesithathu ile-45. Indlovu Iyanyathela isihlohle amabhola angu-50.
Kusasele imidlalo elitshumi, Indlovu Iyanyathela ikhokhela ngemiklomelo eyisikhombisa.
UDimingu Shaibar uhlohle ibhola lokuqala ngemva kwemizuzu engu-27, uLinton Mathe wasehlohla ngemva kwemizuzu eyisitshiya galombili.
ISaint Daniel’s, ezibiza ngokuthi “team no defeat” kodwa esendaweni yetshumi lesikhombisa ilemiklomelo engu-18.
UMathe waphinda wahlohla elesibili ngemva kwemizuzu engu-67, kwathi u-Obidiah Tarumbwa wahlohla elesine ngemva kwemizuzu engu-80. UMathe ukhethwe njengomdlali obeyingcitshi emdlalweni.
Umgcinihlalo uLawrence Machida, uthe ukunqoba lokhu kubonisa ukuqina kweqembu kodwa waxwayisa ukuthi akumelanga bazitshele ukuthi sebefikile.
“Ukuba phambili akusikho isiqokoqela. Umsebenzi wethu kumele kube yikugcina izinga eliphezulu, lokusekela abadlali bethu,” kutsho uMachida.
UMachida uthe ukhuluma lamabaxhasi abalenjongo efana leqembu.
Uthe iqembu lifuna ukwakha ibizo elikhuli.
“Asifuni ukunqoba lonyaka kuphela, kodwa sifuna ukwakha iqembu elizacintisana lamanye amaqembu eminyakeni ezayo.”
UMachida uthe iqembu liphinde lakha izakhiwo zokukhulisa abadlali abancane, ukuthuthukisa indawo zokudlala lokuzimela kwezemali.
“Inhloso yethu yikwenza leliqembu liphumelele laphandle kwenkundla,” kutsho uMachida.
