KULENINA leMinyela elife ngemva kokuqhamuka komlilo endlini ngoMvulo ekuseni, kukanti owesilisa obelapho wenelise ukuphuma kodwa usesimeni esibi.
Umlilo lo, kubikwa uqale ngabo-3 ekuseni, omakhelwane bazama ukuwucitsha ngamabhakede amanzi ngaphambi kokufika kwezicitshamlilo.
Umphathi wezicitshamlilo uMnumzana Mhlangano Moyo uthe owesifazane lo utholakale etshile kakhulu elele ngesisu ngaphansi kombheda ngesikhathi abacitsha umlilo behlola indlu le, elamakamelo amathathu.
“Samukele umbiko wokuqhamuka komlilo, njalo kutholakale owesifazane etshile kakhulu phakathi endlini okucatshangelwa ukuthi ubesedlule emhlabeni ngesikhathi kufika usizo,” kutsho uMnu Moyo.
Indoda ebizwa ngokuthi nguTymon kubikwa iphume ibaleka endlini etshayo kodwa yatholakala isithe daca phansi eduze komgwaqo uNketa Drive loHyde Park Road.
Kubikwa ukuthi indoda le iphele amandla ngenxa yentuthu njalo itshe kakubi okubangele ukuthi igijinyiselwe esibhedlela seMpilo Central Hospital ngemota yezicitshamlilo.
UMnu Moyo uthe umlilo lo ulumathe endlini yokulala, njalo utshise impahla ebezilapho ezingaba yisilinganiso se-80 phesenti.
Uphenyo lokuqala luveza ukuthi intambo zokutshaja omakhalekhukhwini kanye lemitshina yokutshaja kungabe kuyikho okuqalise umlilo. Kucatshangelwa ukuthi ukutshisa kakhulu kumbe iphutha emagetsini kungabe kuyilo elibangele ukuthi izinto ezitshayo ebeziseduze zibambe umlilo.
“Izicitshamlilo zifike kule indawo ngo-3:25 ekuseni ngemva kokwaziswa ngomlilo sekudlule imizuzu eyisithupha,” kutsho uMnu Moyo.
Uthe amapholisa eWest Commonage yiwo asele ehlolisisa njengoba uphenyo luqhubeka ukuze kutholakale imbangela eqondileyo yokuqhamuka komlilo.
