Online Reporter
Ethel Ncube
KULENDODA yeZvishavane elwela impilo yayo esibhedlela kulandela ukugwazwa ngengqamu ngomunye eqolo bebanga ukunyeya omunye ngeviki ephelileyo.
URespect Muyambo oleminyaka engu-32 yokuzalwa wetheswa icala lokugwazwa uBongani Ncube oleminyaka engu-20 ngoba emnyeya enkomponi abahlala kuyo.
Umamangala uNcube wavuka ekuseni ememeza esithi uMuyambo uhlala emnyeya okwadala ukuba ababili laba bacine bexabana.
UMuyambo wakhupha ingqamu wagwaza uNcube kanengi eqolo. UNcube wahlaba umkhosi kwaphuma ezinye izisebenzi zeMthulisi Gold Milling Plant zamlamulela.
Indaba le yabikelwa amapholisa, afika abopha uMuyambo. Umamangala wathwalelwa esibhedlela seZvishavane lapho alwela khona impilo, nanko usesimeni esibi.
Kusenjalo, kulendoda yeNembudziya eGokwe elwela impilo yayo ngemva kokugwazwa kubangwa imfe.
Indaba le yenzakale ngeviki ephelileyo mhlaka 6 Mbimbitho.
Kubikwa uTafadzwa okungasatholakalanga isibongo sakhe, oleminyaka engu-40 yokuzalwa wayevela ezitolo zeNewmine eGokwe North, wahlangana lamadoda amabili, ayizelamani, uConside Rumwayo loNomore Rumwayo.
Izelamani lezi zaqala ukusola uTafadzwa ngokuhamba ekhuluma amanga ebantwini esithi yibo abatshontsha emasimini abantu.
Umamangala wakwala lokho kodwa baqhubeka besithi usebazondisa ngezakhamizi andubana baqale ukumtshaya, bacina sebemgwaza.
Kuthe kunjalo kwavuka umsindo baqala ukutshaya umamangala bencediswa nguTarisai Matsvaire babuye bamgwaza andubana bacele ezinyaweni bebona eselimele.
Isikhulumi samapholisa eMidlands, u-Inspector Emmanuel Mahoko uqinisekise ngezehlakalo lezi zombili.
“Sibophe uRespect Muyambo ngecala lokugwaza enye indoda kubangwa ukunyeyana njalo ukhangelelwe ukungena emthethwandaba maduze.
“Sibophe futhi izelamani uConside Rumwayo loNomore Rumwayo kuthi omunye uTarisai Matsvaire kakatholakali.
“Sicela uzulu ongabe elolwazi ukuthi uTarisai ungaphi azise amapholisa aseduzane laye ukuze abotshwe,” kuphetha uInsp Mahoko.
