Online Reporter
Fungai Muderere
IMIDLALO emibili yobungane phakathi kweqembu lakuleli eleFutsal Five- A-Side leleZambia obekumele iqhutshwe ngoMabasa edolobheni leLusaka, isiyedluliselwe phambili.
Lokhu kuvezwe ngumgcinisihlalo weFutsal- Five-A-Side uPhilani Banda, othe imidlalo le isikhangelelwe ukuba khona ngoNhlangula.
Abadlali bakuleli bebephezulu kokulolongela ukudibana leZambia mhlaka 4 kusiya ku-6 Mabasa.
“Besinxuswe yiZambia ukuthi sidlale labo emidlalweni emibili yobungane mhlaka 4 kusiya ku 6 Mabasa eLusaka.
Kodwa, ngemva kokunanzelela ukuthi ukunxuswa kwethu kuze ngesikhathi lapho lathi siphathekile, sikhethe ukuthi sedlulisele phambili imidlalo le.
“Okunye yikuthi inengi labadlali bethu abalawo amapasipoti, ngakho sidinga isikhathi ukuze sizilungiselele ngokwaneleyo. Ngalokho sibone kungcono ukuthi imidlalo ibe ngoNhlangula.”
Kusenjalo, inhlanganiso yeFutsal- Five-A-Side iphakathi kohlelo lokufundisa abaphathi bomdlalo emhlubulweni ongezansi yelizwe lalabo abasenyakatho mayelana ngokumunyethwe yiFifa Connect Programme.
IFifa Connect Programme incedisa amalunga omdlalo asemthethweni ukuthi enelise ukuxhumana labadlali, abaqeqetshi labonompembe. Uhlelo lolu lunikeza isithupha kuwo wonke umuntu ophatheka kulumdlalo.
Isithupha lesi kubikwa siphethe lonke ulwazi lembali yalo olaso. UBanda uthe ngoLwesihlanu ngeviki edluleyo kwenziwa umhlangano wokufundisana ngalokho koBulawayo.
“Siphakathi kokufundisa abaphathi bomdlalo ngeFifa Connect Programme. NgoLwesihlanu besilomhlangano labaphathi abakulumhlubulo welizwe. Sizakwenza okufanayo labasenyakatho kumalanga alandelayo,” kutsho uBanda.
