Online Reporter
Ethel Ncube
AMAPHOLISA akoBulawayo aseveze ukuba azasebenza gadalala ukuze balwisane lokusentshenziswa kwezidakamizwa edolobheni leli.
Obambele isikhulumi samapholisa koBulawayo u-Inspector Nomalanga Msebele uveze ukuthi abazali abakhangele abantwababo ngelihlo lokhozi ukuze bangalingeki bangene ekusebenziseni izidakamizwa
“Bazali, umntanakho nxa efika lesikhwama sakhe sesikolo, vula ukhangele ukuba esikhwameni kulani. Vulani ngitsho lamabhuku abo ngoba kwesinye isikhathi bafihla izidakamizwa lezi phakathi kwamabhuku.
“Asisukumeni sonke sithi phansi ngezidakamizwa ukuze abantwana bethu babe lekusasa enhle ngoba yiyo kuphela indlela engaphephisa abantwabethu kuzidakamizwa,” kubika uAsst Inspector Msebele.
Uqhubekele phambili ebika ukuba wonke umuntu othengisa izidakamizwa umthetho uzadlala indima yawo.
“Abanye balakho ukuganga baphe abantwana ukuthi bayethengisa izidakamizwa. Nxa ungumntwana usuhlangane lodaba olunjalo, sondela enkambeni yamapholisa eseduzane lawe ubike.
“Nxa usesaba bhala incwadi uphose ku-Suggestion box ungafaki igama lakho.
“Sisebenza ngendlela zonke ukuba bonke abathengisa lezi izidakamizwa umthetho ubabophe. Asiqapheleni izidakamizwa lezi bayazifihla emabhokisini okudla kwabo lawezicathulo wena ucabange ukuba kuthengiswa izicathulo kanti ngitsho bavalele izidakamizwa.
Uthe bakhangelele ukuncedisana lezakhamizi zakoBulawayo ukuthi kubotshwe bonke abathengisa izidakamizwa ngoba bephambanisa ikusasa labantwana.
“Umlandu siwutshiya kubazali bonke ukuthi kabazame ukwelusa abantwana ngokukhangela izikhwama, amabhuku izicathulo, lidinge izidakamizwa ngoba abantwana balakho ukulingeka bangene kuzo,” kuphetha uAsst Insp Msebele.
