Online Reporter
YiNtatheli kaMthunywa
Kulendoda eleminyaka engu-38 yokuzalwa yeVictoria Falls ekhame yabulala umfana oleminyaka engu-17 andubana iyephosela isidumbu echibini lamanzi engcekeza kubangwa amanzi.
Indoda le, uTinashe Wireless Nyarukokora umiswe phambi komthethwandaba kuviki ephelileyo, esetheswa icala lokubulala.
Umsolwa owaziwa ngokuthi nguSpraga wenze icala leli mhlaka 13 Ncwabakazi eVictoria Falls Waste Water Treatment ponds.
Umtshutshisi ubikele inkundla ukuthi mhlaka 12 Ncwabakazi, umsolwa waxabana losengumuyi obeleminyaka engu-17 endaweni efanayo.
Kuzwakale ukuba ngosuku olulandelayo ngehola lika 4 ekuseni, osengumuyi evela etshwaleni eChinotimba wabuye wadibana lomsolwa endaweni efanayo.
Kubikwa umsolwa waqala ukumbhaxabula ngogodo kunye lentambo yamagetsi andubana amkhame aze afe.
Umfana lo esefile, umsolwa wathwala isidumbu wahamba laso okwesibanga samamitha angu-15 wayasiphosela phakathi kwechibi lengcekeza wadliwa ngumswenya.
Mhlaka 16 Ncwabakazi esinye isisebenzi semachibini la sathi sihlola sabona isidumbu sindenda emanzini.
Amapholisa ekuchwayisiseni kwawo, enelisa ukunanzelela ukuba umsolwa uyathinteka kucala leli ngemva kokuba omunye umfakazi ethi wezwa osengumuyi ehlaba umkhosi esithi; “Spraga, Spraga, ungikhamelani?”
Indaba le idluliselwe kumhlaka 3 Mpandula ukuze izothonisiswa.
