YiNtatheli kaMthunywa
KULENDODA yeNsuza esigabeni seNsuza ezabhadla ejele iminyaka engu-15 kulandela ukutholakala ilecala lokudlwengula umzukulu wayo oleminyaka engu-10 yokuzalwa kabili.
Indoda le, esingeke sayiqamba ngebizo ngenjongo yokuvikela umamangala, ilivumile icala lokudlwengula kabili, yatholakala ilecala nguMantshi womthethwandaba wakoBulawayo, uNkosikazi Sibongile Msipa-Marondedze. Umsolwa uzadonsa iminyaka engu-15 ejele ngecala ngalinye, kodwa izigwebo lezi zizahamba ndawonye, okutsho ukuthi uzahlala ejele okweminyaka engu-15 kuphela.
Esethula isigwebo, uNkosikazi Msipa-Marondedze uthe umsolwa wehluleke ukuvikela umzukulu wakhe obekhangelele ukuthi amvikele. Indaba le yaphumela egcekeni ngemva kokuba umamangala ebikele abanye ngokwenzakalayo, okwabangela ukuthi kuyiwe emapholiseni njalo umntwana asiwe esibhedlela ukuyahlolwa,” kutsho yena.
Umtshutshisi, uNkosazana Karen Gundani, ucele inkantolo ukuthi inike umsolwa isigwebo esiqinileyo sokuvalelwa ejele, ubuhlobo kanye lobuncane bomntwana benza icala lakhe libe nzima.
“Amacala la awenzakalanga kanye kuphela, kodwa wakuphinda, okutsho ukuthi wayeqhubeka ngomkhuba lo omubi.”
Uthe izenzo zikamsolwa zitshiye umntwana elokwesaba njalo ehlukumezekile. Kubikwa mhlaka 9 Mpandula, ngesikhathi umsolwa lomntwana belele endlini yinye. Umsolwa wayelele embhedeni, umamangala elele phansi labanye abantwana. Umsolwa wavuka wamdlwengula. Waphinda ukwenza lokhu mhlaka 29 Mfumfu. Indaba le yaphumela egcekeni ngemva kokuba umntwana esebhoboze ithumba.
