YiNtatheli kaMthunywa
AMAPHOLISA asebike ukuthi asebophe indoda yeNkayi ebonakala ibhaxabula umfundi kuvidiyo esabalele kunkundla zokuxhumana kuyonale iviki ngoba eyaliwe.
Kubikwa umetheswacala esingeke samqamba ngenhloso yokuvikela umamangala, wabhaxabula umfundi lo, oleminyaka engu-16 yokuzalwa ngemvubu mhlaka 30 Mfumfu esiqintini seSingeni, eNkayi esendleleni yokuya ngakibo.
Umetheswacala owaziwa ngebizo elithi Zulu kuphela, kubikwa ukuthi uvela endaweni yeLuhumbe esigabeni seGwambe eLupane, eduzane lomngcele wesigaba seNkayi.
Umfundi lo kubikwa ukuthi wayehamba labanye abafundi sebebuyela emakhaya bevela esikolo ngesikhathi kusenzakala isehlakalo lesi.
Umetheswacala akukatholakali ukuthi uleminyaka emingaki njalo amapholisa asaqhubeka ngokuchwayisisa udaba.
“Amapholisa aqinisekisa ngokubotshwa kwendoda, okungakatholakali ukuthi ileminyaka emingaki, ngemva kokusabalala kwevidiyo ebhaxabula umfundi oleminyaka engu-16 ngemvubu.
“Isehlakalo lesi senzakala mhlaka 30 Mfumfu esiqintini seSingeni, eNkayi ngemva kokwaliwa,” kutsho isitatimende samapholisa kunkundla yokuxhumana ye-X eyayisaziwa ngokuthi yiTwitter.
Ukusabalala kwevidiyo le, kwenza abantu bachothoza isenzo sikametheswacala njalo yikho okwenze umetheswacala wabotshwa.
Umalumekazi womfundi lo, uNkosozana Siphahliwe Gumude, uthe umfundi lo ujayele ukubuyela ekhaya maviki wonke ngoLwesihlanu ngoba efunda khatshana.
Uthe intombazana le yafika ngekhaya ilimele, umzimba uvuvukile njalo iyunifomu yesikolo idabukile.
“Wafika elemvimvinya umzimba wonke, wasitshela ukuthi utshaywe ngumfana owayelabanye ababili. Iyunifomu yayidabukile njalo wayesehluleka ukuhamba. Ulandule ukuthi wayethandana lomfana lo. Sithemba amapholisa azalithola iqiniso ngendaba le,” kutsho yena.
UNkszn Gumude ubekhuluma ngesikhathi exoxisana lentatheli esesibhedlela seMbuma Mission Hospital, lapho umfundi lo ayeselatshwa khona.
Uthe iyunifomu yomfundi yayilamatshatha egazi njalo kayisagqokeki.
Isisebenzi esibona ngezohlalisana emakhaya, uNkosazana Ntombizodwa Moyo, uthe kudingeka ukuthi kwakhiwe isikolo samabanga aphezulu endaweni le ukuze kwehliswe imango ehanjwa ngabafundi besiya esikolo.
Uveze ukukhathazeka ngembiko ethi abafana bachathamela amantombazana esikolo endleleni ezingelabantu, bewahlukumeza njalo bewatshaya nxa esala ukuthandana labo.
“Umntwana watshaywa okuzwayo. Uyehluleka lokuthwala loba yini ngenxa yobuhlungu. Uthi uzwa ubuhlungu emlenzeni lasemahlombe. Umfundi lo uphike ukuthi wayethandana lomsolwa. Uthe umazi njengomdlali webhola oyake azodlala esikolo sakhe. Kodwa loba kungaba njani, akulasizatho esingavumela isenzo asenzileyo,” kutsho yena.
UNkszn Moyo uthe ukhathazekile enhliziyweni ngenxa yesimo somfundi lo njalo ucela ukuthi kuthathwe amanyathelo okuvikela amantombazana endaweni le.
Uthe amanye amantombazana ayekela isikolo ngenxa yokukhulelwa, kuthi amanye ayesaba ukuqhubeka esiya esikolo ngenxa yokuhlukuluzwa endleleni.
Umcebisi wenhlanganiso yeWomen’s Forum, uNkosazana Lizinethi Beta, uthe kulendingeko yokuthi kuthathwe amanyathelo aqinileyo okulwisana lokuhlukunyezwa kwabantwana besikolo.
“Sizancedisa umfundi lo ukuze athole ukwelatshwa okufaneleyo kanye losekelo ngokwengqondo. Sikhathazeke ngamajaha lamadoda ahlukumeza abantwana abavela esikolo. Kudingeka ukuthi bonke abathintekayo bahlanganise izandla nxa sifuna ukwehlisa udlakela olusekelwe ngokobulili,” kutsho yena.
