Online Reporter
YiNtatheli kaMthunywa
KULENDODA okubikwa isebenzisa amabizo amahlanu, ebigqekeza ezindlini, ibamba inkunzi, idlwengula abesifazane egwetshwe iminyaka engu-100 ejele.
Kubikwa indoda le, u-Isah Siyabu, ubesaziwa njalo ngokuthi unguBlackie, Innocent Kajira, Anorld Pemhiwa, Enock Kajira lokuthi Issah Chikazamba.
Idabuka ePfupajena, eChegutu, esabelweni seMashonaland West.
Osaphethe isikhundla sesikhulumi samapholisa kuhlangothi lwe-CID, uDetective Assistant Inspector Merylin Muriro, uthe u-Isah wayehlasela izakhamizi zeBorrowdale laseMt Pleasant eHarare.
“Siqinisekisa ukubotshwa lokugwetshwa kuka-Isah Siyabu oweChegutu ngamacala amanengi agoqela ukugqekeza ezindlini, ukudlwengula abasifazana, ukubamba inkunzi lokutshontsha. NgoNhlolanja 2024, wasebenzisa amabizo amanga, wabotshwa eChegutu ngemva kokutholakala ukuthi wayethwalise nzima izakhamizi zeBorrowdale ngokugqekeza ezindlini.
“Uphenyo olwenziwa ngamapholisa lwaveza ukuthi wayengena ezindlini, etshontsha imali, omabonakude, izigqoko, izicathulo amafoni lokunye. Kwezinye izikhathi wayedlwengula abesifazana engazivikelanga,” kubika uDet Insp Muriro.
Kulandela ukubotshwa kwakhe, u-Isah wamiswa phambili komthethwandaba kaMantshi uNkosikazi Loice Mukunyadze eHarare, wagwetshwa mhlaka 10 Mfumfu lonyaka.
Wetheswe amacala angu-25, wagwetshwa iminyaka engu-100. Wehliselwe iminyaka elitshumi nxa engaziphatha kuhle,
kunye leminye engu-40, okutsho ukuba uzahlala ejele iminyaka engu-50.
