Online Reporter
Ethel Ncube
ZISELE zikhakhamele izakhamizi zeChiredzi ebezisesililweni kulandela ukuba kuthutshe enye indoda yagwaza abantu abane kwafa ababili abanye bathwalelwa esibhedlela lapho abalwela khona impilo zabo.
Kubikwa uLiberty Sibanda oleminyaka yokuzalwa engu-19 ohlala ngaphansi kukasobhuku uMashavele ngaphansi kwenduna uGezani eChikombedzi, eMasvingo, wagwaza abantu laba mhlaka 3 Ncwabakazi emfeni eyayisemzini kaRachel Siwawa.
Kuzwakale ukuba umetheswacala wathutsha egijima ngabo 10 ebusuku ephethe i-torch ephandla abantu ababesemlilweni wezwakala esithi, “nguwe engikudingayo” andubana agwaze abane laba.
Kuvele ukuthi umetheswacala waqala wagwaza ababili imsipha kuthe ababili bezama ukulamula wabaphendukela wabagwaza.
Abedlula emhlabeni kusehlakalo lesi nguVirginia Mahlanza loSithokozile Siwawa kukanti uElisha Siwawa loRachel Siwawa bathwalelwa esibhedlela.
Kubikwa uSibanda waqonda kuSithokozile Siwawa wamgwaza esihlathini wawela emlilweni. Esephansi, uRachel wazama ukuba amkhuphe emlilweni laye bamgwaza, uSithokozile wahle wedlula emhlabeni.
UVirgina Mahlanza wagwazwa eqolo lasesiphaqeni laye wavuka wazama ukuhamba 20 metres esuka emlilweni, akula owambonayo wabonakala ngosuku olulandelayo wagijinyiselwa esibhedlela seChikombedzi bafika bamdlulisela esibhedlela seMasvingo lapho afika alala khona ubusuku obubodwa wabhubha ngelanga elilandelayo.
Isikhulumi samapholisa eMidlands u-Inspector Kudakwashe Dhewa uqinisekise ngesehlakalo lesi.
