Online Reporter
Gibson Mhaka
KUSEHLAKALO esitshaqisayo, esitshiye umphakathi weFigtree esabelweni seMatabeleland South ubambe owangaphansi, kubotshwe owesilisa ngecala lokudlwengula imbuzi ezintathu, kwafa ezimbili ngenxa yokudinwa.
Indoda le, uBrighton Mkandla oleminyaka engu-33 yokuzalwa, ohlala eCliffton Farm, usolwa ngecala lokudlova imbuzi zikaCecilia Sibanda (85) loMayibongwe Ndlovu (28) okwadala ukuthi zife.
Kubikwa lokuthi wabanjwa edlova imbuzi ka-Elmon Ndlovu (65).
Mhlaka 15 Ncwabakazi, ngehola letshumi ebusuku, uNdlovu ohlala kuStand 01 eSydney Malunga Village, wezwa imbuzi yakhe ikhala esibayeni. Waqala ukusola, waphuma lethotshi esiyakhangelisisa.
Uthe efika esibayeni wathola uMkandla eguqe ngamadolo enqunu, ibhulugwe lisemadolweni, ezitika ngocansi lenye yembuzi zakhe.
Ngesikhathi uNdlovu ebiza igama lakhe uMkandla ucele ezinyaweni, wangena ihlathi eliseduzane.
Ngelanga elilandelayo ekuseni, uNdlovu encediswa nguTrynos Nyathi walandela umkhondo wenyawo owawusuka esibayeni owabafikisa emzini kaMkandla.
Mhlaka 31 Ncwabakazi, ngehola letshumi ebusuku uSibanda oweStand 02, eSydney Malunga Village, wezwa enye yembuzi zakhe ibanga umsindo.
Uthe esadingisisa okwenzakalayo, wethuka ebona uMkandla esibayeni ematasatasa ezitika ngocansi lenye yembuzi ezinsikazi. Wabaleka esebona ukuthi usebhaciwe.
Kubikwa ekuseni ngehola lesithupha uSibanda wabuyela esibayeni ukuze ahlolisise wathola imbuzi yakhe ifile.
Yena lezinye izakhamizi balandela inyawo zikaMnkandla, kusukela esibayeni, bafika lapho ahlala khona.
Bahlangana loMayibongwe ohlala kuStand 12 Mafela Village, owathi esizwa ngodaba, wagijima wayahlola esibayeni sembuzi zakhe, wathola enye ifile, kucaca ukuthi idloviwe.
Izakhamizi zancedisa ukuthi kubanjwe uMkandla emzini wakhe, okubikwa wahle wavuma amacala akhe.
Wahanjiswa emapholiseni.
UMkandla, umiswe phambi kukamantshi wePlumtree uMnumzana Joshua Nembaware esetheswa amacala amathathu okulala lenyamazana.
Uliphikile icala njalo uzagcinwa esitokisini kuze kube ngumhlaka 12 Mpandula, sokuthonisiswa icala.
UNkosazana Sheila Nyathi ubengumtshutshisi.
