Online Reporter
Sukulwenkosi Dube-Matutu
KULENDODA yeLupane ebotshiweyo kulandela ukudlwengula lokubulala isalukazi esileminyaka engu—89 yokuzalwa.
Isikhulumi samapholisa esigabeni seMatabeleland South, uInspector Chiratidzo Dube, uqinisekisile ngesehlakalo lesi esenzakale endaweni yeMaphisa mhlaka 16 Mpalakazi.
Uthe uNdabezinhle Ndlovu (33) uhlasele u-Annie Dube (89) watshiya isidumbu egangeni eliseduze.
“Mhlaka 16 Mpalakazi ngehola lika 2 emini uNkosazana Liznet Sibanda owayehlala lomuyi wasuka watshiya u-Annie Dube eyedwa,” kutsho u-Insp Dube.
Uthe inkinga yananzelelwa ngalobobusuku ngesikhathi uSibanda efika ekhaya.
“Ekubuyeni kwakhe ngehola lika-9 ebusuku ngalelolanga, uSibanda wathola ukuthi uDube kakho ekhaya wasedinga ukuthi angamthola kodwa wehluleka.”
Ukudingwa kukaDube kwaqhubeka kwaze kwaba lilanga elilandelayo.
“Mhlaka 17 Mpalakazi ngo-2 ekuseni uNkkz Sibanda ubambisane labomakhelwane bakhe badinga umuyi eceleni komuzi,” kutsho u-Insp Dube.
Omakhelwane babona umzimba kaDube, engagqokanga ingxenye yomzimba, elamanxeba esihlathini sesandleni senxele egangeni elingaba yisibanga samamitha angu-150.
Indaba le yabikwa emapholiseni afika kundawo yesehlakalo kwakhokhela ekubotshweni kukaNdlovu oncedisa amapholisa ekuchwayisisweni kwendaba le.
Amapholisa athe uphenyo luyaqhubeka njalo umetheswacala uzavela emthethwandaba maduze.
