Londile Moyo
YiNtatheli kaMthunywa
KULoNDODA yeGlen Lorne eHarare okucatshangelwa ukuthi idubule unkosikazi wayo ngaphambi kokuthi izidubule ngombhobho ngoLwesihlanu olwedluleyo, kusehlakalo okusolakala ukuthi sihlobene lodlakela lwangekhaya olubangelwe lucingo.
UGivemore Tawanda Madzinga, kubikwa ukuthi udubule unkosikazi wakhe, uNelisa Madzinga, 40, wamlimaza ehlombe ngaphambi kokuba azidubule azibulale.
Isehlakalo lesi senzakale endlini yabo eCastle Close eGlen Lorne, kulabantwababo abane abaleminyaka engu-14, 12, 9 le-8.
Kubikwa ukuthi ukungaboni ngaso linye kwalaba ababili kuqale ngoLwesine kusihlwa ngemva kokuba uTawanda eyamukele ucingo oluvela kudlalicatsha lakhe.
NgoLwesihlanu ekuseni, kuthiwa wavuka waqala ukutshaya uNelisa lezingane zabo ezine.
UNelisa kubikwa ukuthi wamncenga ukuthi aye eZRP Highlands ukuze udaba lulungiswe kodwa wala.
Wabe esenquma ukuthi ayekwenza umbiko yena.
Kubikwa wathi esehla ngezitebhisini ekhangele egarajini, wezwa kuqhuma isibhamu kabili wezwa ubuhlungu obukhulu ehlombe lakhe lwesandleni sokudla.
Waqonda egarajini wafica uTawanda elele phansi ephuma igazi ngamakhala. Umakhelwane uphuthume wafika endaweni yesehlakalo wathatha uNelisa wamusa esibhedlela se-Avenues Clinic, ukuze ayekwelatshwa.
“Sezwa kuqhuma isibhamu sathi singena endlini yabo, sathola ukuthi isidumbu sikaTawanda silenxeba lokudutshulwa entanyeni.
“Unkosikazi uthe ukungezwani kwabo kuqale ngesikhathi uTawanda efonelwa yintombi yakhe.”
Isibhamu i-FN Browning esiyi-6,35mm, esibhaliswe egameni likaTawanda ngaphansi kwenkampani yakhe futhi silelayisensi, sitholwe eceleni kwesidumbu. Isidumbu sihanjiswe emotsha yesibhedlela seParirenyatwa ukuze siyehlolwa.
Online Reporter