Online Reporter
YiNtatheli kaMthunywa
KULENDODA eleminyaka engu-23 yokuzalwa yelokitshini leGwabalanda koBulawayo egwetshelwe ukuyapika inyanga eziyisithupha ejele kulandela ukutholakala ilecala lokuhlanyela imbanje.
UMichael Silas umiswe emthethwandaba weWestern Commonage esetheswa amacala amabili, elokuqala lingelokutholakala elephakethe lembanje lapho agwetshwe insuku ezingu-30 esejele. Kucala lesibili elokulima imbanje ugwetshwe inyanga eziyisificamunwe munye kwathi inyanga ezine zalengiswa kukhangelelwe ukuba angadali icala elifanayo kuminyaka emihlanu ezayo.
Umantshi uMnumzana Archie Wochiwunga uthe uSilas uzapika inyanga ezinhlanu.
Umtshutshisi uNkosazana Audrey Kufandikanwe, ubikele inkundla ukuthi mhlaka 16 Nkwenkwezi amapholisa eLuveve Police Station athola udletshana lokuthi umsolwa ulima imbanje.
Kucala lokuqala umtshutshisi ubikele inkundla ukuthi amapholisa afika endlini kamsolwa amfica elele basebehlola indlu yakhe bathola iphakethe elilodwa lembanje phakathi kwewadilobhu kunye lesihlahla sembanje phezulu kwewadilobhu.
Kubikwa ngosuku olufanayo ngehola lika 1 ekuseni umsolwa wakhokhela amapholisa baya esivandeni sakhe esingemva kwendlu bathola izihlahla ezingu-126 zembanje.
Amapholisa asuphuna izihlahla lezo ezilobude obuphakathi kwe-30 centimetres le 100 centimetres.
