Indoda ‘ilalisa’ isithandwa lompankwa

Palawan Monitor Lizard - rests on a path with its tongue outstretched (the tongue has a highly developed olfactory sense) to smell 'a visitor'

Muchaneta Chimuka

KUDABA olutshwaqisa umzimba, kulendoda eyabamba ngamandla intombi ethandana layo ukuthi iye emacansini lompankwa ukwenzela ukuthi uthando lwabo luqine lokuthi amgezise.
UTatenda Charamba (25), osebenza ekhansilini yedolobho leChitungwiza, watshelwa ukuthi enze lokhu ngesinye isangoma. UCharamba kubikwa njalo ubehlukumeza isithandwa sakhe ngokocansi okwesikhathi eside.

Umsolwa umiswe phambi kukaMantshi uGloria Takundwa esetheswa amacala amathathu okudlwengula. Ugwetshwe iminyaka engu-30 ejele, wehliselwa elitshumi, okutsho ukuba uzapika iminyaka engu-20.
Umtshutshi uTendai Ruwocha utshele inkundla ukuthi uTakundwa wahlukumeza isithandwa sakhe ngokusethusela, ukusebenzisa imithi, emchazela ukuthi yikho akutshelwe yisangoma ukuze baqinise uthando lwabo.

Kubikwa mhlaka 19 Mbimbitho uCharamba wenze esinye isiga, edonsela isithandwa sakhe kwenye indawo yokuzithokozisa eduze ledamu leManyame. Wayethwele imbhodlela elekhondomu, inyoka, usiba lelembu elibomvu. Phakathi kwembhodlela le kwakulamabizo abo.
Ngemva kwamalanga amabili, waphinda okufanayo esithi isithandwa sakhe kumele kube yiso esijika imbhodlela. Isithandwa lesi sala ukuya emacansini, uCharamba wasuka lapho wamethusela ngokuthi uzamenza alale lenyoka, ixoxo lompankwa.

Ngenxa yokuhlukunyezwa lokhu lokwesaba, owesofazane lo wakhetha ukuthi alale lompankwa.
Mhlaka 22 Mbimbitho, wacela isithandwa sakhe ukuthi baye emacansini kodwa, wacina esemdlwengulwa kanengi nengi.

Inina leli lacina seliveza ngokuhlukunyezwa kwalo selibikela umngane walo lomfundisi, kwasekubotshwa uCharamba.