Online Reporter
Rutendo Nyeve
IZAKHAMIZI zesiqintini seLukunguni, eFolosi, esabelweni seMatabeleland North zithole ukudla kwamehlo kusilwa amadoda amabili, enye ilunywa amakhala ngendlela esabekayo kumaviki amabili adluleyo.
UKelvin Ndebele, oleminyaka engu-22 yokuzalwa, ohlala eLukunguni Village 1, eJambezi, ngaphansi kwenduna uShana, umiswe phambi kukamantshi uLinda Dzvene ngecala lokuhlukumeza uNkosiyenzile Gumede (22).
Kubikwa uNdebele watshaya uGumede ngamatshe, qede lapho wamluma, emethesa icala lokuthi uyamnyeya esigabeni.
Isehlakalo lesi senzakala mhlaka 3 Ntulikazi ngehola lesikhombisa ekuseni.
“UNdebele wahlukumeza uGumede ngokumjikijela ngamatshe, emtshaya umzimba wonke,” kubika umtshutshisi uPortia Moyo.
“Kuthe uGumede ezama ukuzivikela, uNdebele wakhetha ukuthi amlume amakhala.”
Udaba lolu lwabikwa emapholiseni, kwabotshwa uNdebele. UGumede wahanjiswa esibhedlela ukuze ayekwelatshwa.
Umtshutshisi uqhubeke wathi: “Umsolwa wenze lokhu ngenhloso yokulimaza omunye.”
UNdebele ugcinwe esitokisini elindele ukugwetshwa ngoMvulo. Icala leli lisemlonyeni yabantu esiqintini seLukunguni.
