Ize yanqoba iHighlanders

Highlanders FC players celebrate their solitary goal against Green Fuel FC at Barbourfields stadium yesterday. Masoni Mushore shows his tribute to the late Bosso and FC Platinum midfielder Brian 'BB' Banda. (Picture by Nkosizile Ndlovu)

Brandon Moyo

NGEMVA kwemidlalo emithathu ibona intuthu, iHighlanders ize yanqoba egumeni layo, idlula phezulu kweGreenfuel nge 1-0 kumdlalo weCastle Lager Premiership ngeSonto emini.
Kuhlohle uMafios Chihweta kusigaba sokuqala somdlalo, ngomzuzu wesi-40. Kube libhola lakhe lesibili kulumdlali lokhe wafika kuTshilamoya.

Bekungumdlalo obungahlabusi njalo ukuhlohla kukaChihweta yikho okuvuse idlabuzane lakubabukeli, nanko kulequla labasekeli ebeliphethe ngokutshengisela ukukhonona kubukhokheli beqembu phandle kwenkundla.
Abasekeli laba bathi bafuna kube lokhetho olutsha lwabakhokheli futhi olusegcekeni mayelana lokuphathwa kwemali yeqembu.

IHighlanders ithole ithuba lokuhlohla okwakuqala ngomzuzu wesi-27, ibhola liphuma enyaweni zikaChihweta kodwa lanamathela izandla zikanozinti weGreenfuel uAshely Ryners. Akuhlalanga isikhathi, uMvelo Khoza ungenise ibhola “emsindweni” elisusa kwesokudla, lathola uRyners elindele, waliphosela phandle kwegedi.

Ngomzuzu wesi-33, uReason Sibanda uzame ukuthi ahlohle ngesikhathi ethola ibhola phakathi kwebhokisi kodwa kwacina sekuyi-corner kick. IBosso yehluleka ukusebenzisa ithuba.
Kusigaba sesibili somdlalo, iGreenfuel iphenduke isithe khwatshu. Ithole amathuba ambalwa kodwa kwehlula ukuthi ihlohle.

Umdlali wayo uDenzel Mupuwa utshaya i-free kick egcekeni, kuvuleke igedi, wathela ibhola phezulu kwemvimbi zeBosso.
Owake wadla ubhedu enkundleni, esakhula emdlalweni uRonald Chitiyo ungeniswe emdlalweni ngomzuzu wesi-76, etshaya ibhola elifike lathinta ezandleni zikanozinti weBosso Reward Muza, qede lapho latshayelela ku-cross bar.

Kusebenze lokukhalipha kuka-Arthur Ndlovu, obesebhokisini ngaleso sikhathi ukuthi avale ibhola.
Amaqembu ebemi kanje:

Highlanders: Reward Muza (gk), Mvelo Khoza, Arthur Ndlovu, Reason Sibanda (Nqobile Ndlovu, 70mins), Andrew Mbeba, Mason Mushore, Never Rauzhi, Darlington Munkuli (Gillian Nyathi, 70mins), Hubert Ncube, Luckmore Mutumbi, Mafios Chihweta (Panashe Mushonga, 46mins)

GreenFuel: Ashely Ryners (gk), Blessing Kugudu, Emmanuel Chikwende, Robert Kwaramba, Colins Mujuru, Garikai Dematsika, Clive Rupiya (Ronal Chitiyo, 46mins), Adrian Silla, Kudzai Ngwende, Harrison Masina (Godknows Mutina, 66mins), Perfect Chikwende (Denzel Mapuwa, 56mins)