Online Reporter
Sikhumbuzo Moyo
KUSEHLAKALO esihlasimulisa umzimba, kulendoda yakoMadlambuzi, esigabeni seBulilima, eMatabeleland South, ebulale abantu abahlanu abakulindawo ngoLwesine ngeviki edluleyo.
Ebantwini laba, abathathu ngabemuli yinye.
Indoda le kubikwa yaqala ukubulala elinye ixhegu, ilitshaya ngogodo, qede lapho yalanda umkalo, yamtshaya yamtshiya esethule.
Ngokutsho kukakhansila kaWard 11, uSiphosenkosi Moyo, indoda le yasuka lapho yangena emzini oseduzane, yabulala amalunga emuli inye amathathu, okugoqela inkazana eleminyaka engu-15 yokuzalwa.
Uthe omunye umfana, wenelisa ukubaleka.
“Wathi esebalekelwe ngumfana lo, indoda le okucatshangelwa ukuthi kayiphilanga engqondweni, yafika edamu eliseduzane lalapho eyathola khona elinye inina liwatsha impahla. Yalibulala. Sididekile ngokwenzakeleyo,” kutsho ukhansila uMoyo.
Uthe izakhamizi lamapholisa ziphume ijumo, zamlonda umbulali lo, zamthola ngemva kwamahola ambalwa.
Isikhulumi samapholisa esabelweni seMatabeleland South uInspector Chiratidzo Dube kazange achaze okunengi, ebika ukuthi imibuzo iye kusikhulumi samapholisa elizweni lonke, uCommissioner Paul Nyathi.
Ifoni kaComm Nyathi ibingangeni, ngesikhathi kudingwa umbiko ogcweleyo ngodaba lolu.
