Online Reporter
Nkosilathi Sibanda
INDUNA uNkalakatha eyesigabeni seNkayi, eMatabeleland North isikhuthaze intsha ukuthi iphathe impilo yayo ngobuqotho, ilwise ukusetshenziswa kwezidakamizwa kunye lokunatha utshwala, okuthiwa sekusabalale kakhulu endaweni.
Ekhuluma lephephandaba likazulu kunsuku ezisanda kwedlula, induna uNkalakatha uthe intsha yalamuhla kumele ibambisane ukuthuthukisa umphakathi ngokuzimisela, isungule amathuba emisebenzi, njalo ingalindeli ukuthi izadinga imisebenzi ngemva kwezifundo.
“Ngithi bantwabami, isikhathi sokuhlala silindele ukuphiwa imisebenzi sesadlula. Kumele senze okuthile ngezandla zethu, ukufuya, ukulima, ukwenza imsebenzi yezandla, lokuphatheka kumaphurojekithi okuthuthukisa indawo yethu,” kutsho induna uNkalakatha.
Uthe okunye okubalulekileyo yikuthi intsha ikhuthale kakhulu kwezemidlalo ukuze ithuthukise amathalenta ayo lokuzigcina ikhululekile kuzidakamizwa.
“Imidlalo ivula amathuba amanengi. Iyasiza ukuthi umuntu ahlale ekhuthele, ikanti njalo ibuyisela emuva imikhuba emibi efana lokusebenzisa izidakamizwa.
“Ngiyabonga kubahleli bomncintiswano weNkayi Youth Football Tournament ngoba abakwenzileyo ngokuhlanganisa intsha yethu kungumsebenzi owenza umehluko omkhulu.”
Uqhubeke wathi ezemidlalo zibalulekile ekubambaneni kwabantu, ikakhulukazi intsha, njalo zingasetshenziswa njengendlela yokulwisana lokusetshenziswa kwezidakamizwa.
Induna icele ukuthi abakhokheli, abazali loHulumende basebenzisane ekuqondiseni intsha ngendlela elungileyo, ukuze isigaba seNkayi sibe lesizukulwane esiqotho, esilolwazi njalo esilungele ukwakha ikusasa elengqubekela phambili.
