Vusumuzi Dube
Sikhumbuzo Moyo
Kulokucatshangelwa kokuthi inkokheli zomdabu zinikwe amandla okuhlawulisa amalunga omphakathi angazinanziyo izixwayiso eziphathelene lokuchapha kumbe ukuzama ukweqa imifula egcweleyo, njengoba inani labantu abafa ngenxa yengozi zemvelo ezidalwa ngamanzi liqhubeka lisanda.
Kusukela ekuqaleni kwesikhathi sokuna kwezulu sika 2025/26 ngenyanga kaMfumfu nyakenye, ugatsha lweCivil Protection Unit lubike ukuthi abantu abangu 79 balahlekelwe zimpilo zabo , abangu 61 balimala ngamazinga atshiyeneyo kwathi imizi engu-1 068 yatshabalaliswa kumbe yonakaliswa.
Engxoxweni ebekhona lamuhla (NgoLwesithathu), uMqondisi oyiNhloko walolugatsha uMnumzana Nathan Nkomo uthe ukubonisana leziphathamandla kuyaqhubeka ukuze esikhathini esizayo, abakhokheli bendabuko babe lamandla okujezisa loba ngubani endaweni yabo obonakala engazilaleli izixwayiso ezivela kuziphathamandla. Kuyadanisa kakhulu ukuthi silabantu abaqhubeka bengazinaki izixwayiso eziqhamuka kuziphathamandla yikho nje sibonisana labakhulu bethu ngombono wokuthi abakhokheli bethu bendabuko banikwe amandla okuhlawulisa loba ngubani endaweni yabo ongazilaleliyo izixwayiso lezi. Asingeke sivumele ukuthi silahlekelwe zimpilo zabantu ngalindlela,” kutsho uMnu Nkomo.
Unxuse izinhlanganiso ezitshiyeneyo ukuthi zingadinwa yikukhipha izixwayiso emphakathini, ikakhulu njengoba izulu liqhubeka lisina.
Uthe zonke inhlanganiso eziphathelene lokuncedisa abantu nxa kuthe kwabalengozi kumbe isehlakalo semvelo esifana lezikhukhula zihleli zilinde ukusiza umphakathi ongabe udinga usizo yiloba nini.
Online Reporter