admin
YiNtatheli kaMthunywa
ZISELE zizidla izibindi indlamanzi zesigabeni seSingeni eNkayi ngemva kokuba omunye wazo ethunyelwe indwangu ukuthi izothonisa isikwelede se$5, uMthunywa uyakuveza lokhu lamhlanje.
Isiga lesi senzakale ngoLwesithathu ngeviki ephelileyo lapho uMnumzana Tholani Sibindi “avakatshelwe” yindwangu le izothatha isikwelede asicela kuMnumzana Celani Ndlovu.
Kubikwa uMnu Sibindi wehluleka ukubhadala isikwelede lesi ngesikhathi ababethembisane ngaso okwenza wathunyelwa indwangu le ukuthi izosithonisa.
Intatheli ixhumane lesinye isakhamuzi esasikhona kufika leyonyamazana uMnumzana Thembani Moyo obikele uMthunywa ukuthi lokhu etshe amathe ngesiga asibonayo mhlalokho.
“Sasizikwejisele nje emini sizidlela amabele singobaba sabona sekulendoda ehlezi esitulweni igqoke isudu eyikhakhi sayibingelela singananzeleli ukuthi yinyamazana,” kutsho uMnu Moyo.
Uqhubekele phambili eveza ukuthi akubonayo kakaze akubone lokhu wathwetshulwa yingwe.
“Ithe lindoda ilokhu isahlezi sayicela ukuthi ikhuphe ingwane ekhanda yavuma kuhle. Yaphendula yathi; ‘Badala ngicela ukuthi ngingachithi isikhathi senu ngithunywe ngubaba uthe ngizolanda imali yakhe kuSibindi,” kuchaza uMnu Moyo.
“Ngemva kwalokho yakhipha ibhatshi lengwane ekhanda ngabona kuyindwangu. Lwangitshaya lwangeqa uvalo ngehluleka lokubaleka amanye amadoda angikhulumi ngabona emabhulugweni konakala ngendlela abasebeqhuqha ngayo ngoba singakaze sibone indwangu ekhulumayo,” kulandisa uMnu Moyo.
Ekhuluma lentatheli uMnumzana John Ncube uchaze ukuthi lokhu kwamqeda amandla.
“Lokhe ngimadolo nzima ngokwenzakala komakhelwane sinatha lokuthi yathutsha ngaphi indwangu mina ngabona ‘indoda’ sihlezi esitulweni ngazibuza imibuzo eminengi ukuthi ithutshe ngaphi.
“Ngezwa sokubuzwa isikwelede kuSibindi esasinatha laye andubana imqhubele incwadi lapho okwakubhalwe khona:
Kuwe Sibindi ngicela unike ubaba lo engimthumileyo i$5 yami nxa kungenjalo uzahlala lawe uze uyithole.
Yimi ozehlisayo
uNdlovu.
“Yabalwa nguSibanda qede wayibeka phansi waqaleka, indwangu le yasivalelisa yathi izaphenduka ntambama,” kutsho uMnu Ncube.
Iphephandaba likazulu libikelwe ukuthi uMnu Sibindi wathi ephaphama waqonda endlini wayabhadala imali yabanikazi.
UMthunywa uxhumane lomka-lowo owathumela indwangu, uNkosikazi Lethokuhle Ndlovu ovumileyo ukuthi ngempela bathuma indwangu ukuyathonisa isikwelede.
“Sayithuma lobaba indwangu siyigqokise isudu ngoba umuntu lo ubesenza inkani ukuthi abhadale amadola ami.
“Sayipha incwadi ebhalwe ukuthi sicela i$5 nxa kungenjalo izahlala laye kodwa yaphenduka ingaphathanga lutho.
Sithe sisahlezi sabona sethelekile uSibindi le$5 kakhulumanga lutho wasiqhubela imali kuphela,” kuchaza uNkkz Ndlovu.
Ebuzwa nguMthunywa uNkkz Ndlovu ukuthi angabe wayithatha ngaphi njalo isebenzani indwangu le uchaze ukuthi ngeyezikwelede labalenkani.
“Indwangu le sayitshiyelwa ngugogo womkami wathi izasilwela kukho konke okusihluphayo.
“Siyithuma ungasiqala ukuze ilwisane lawe labakweleda bengabhadali kungaba yimali, impuphu kumbe itshukela asizihluphi ngokubalandelela, sibhala phansi siyinike. Esikhathini esinengi ihlala egangeni kodwa indlu yayo yisiphala,” kuphetha uNkkz Ndlovu.
Online Reporter