adminCharles Dube
Masingaphicwa lulimi lwembongi lapha bafundi ukuthi ingabe itshoni ngokulala lapha. Ukulala lokhu okutshiwo yimbongi yikufa hatshi lokhu ukulala ubuthongo silalise imizimba. Ingathekise ukulala lapha imbongi iveza ukuthi ekufeni sonke abantu siyalingana. Itshaya ekhaleni imbongi ekuqaleni kwenkondlo yayo ukuba leli liqiniso elingavikwayo, ungeze wakuphika lokhu ngoba liqiniso. Iqiniso leli limfikela ephakathi kokulala ngoba uthi liza ephutsheni.
Iqiniso leli elimfikela ephutsheni libalisa ngokulingana koluntu. Olungileyo uyalala kusitsho ukuba uyafa, uyabhubha. Iqinisiso leli elingokufa lithi isigelekeqe, isigebenga, umabulala abanye uyabulawa laye. Ngakwelinye icele omuhle uyadlula, kusitsho ukuthi uyafa laye. Omude uyabhubha kuthi lomfitshane laye kube ngesifanayo abhubhe. Ocebileyo, sona isinothi phela siyawatshiya amabele okutsho ukuthi laso siyafa, ngokufanayo umyanga laye uyafa.
Oqakathekileyo laye kuyamphelela ngakho ukufa kuthi labazelweyo labo badlule ngokufa. Isikhwicamfundo laso siyayitshiya leyomfundo kanti ngakwelinye icele impumputhe layo ihlatshelelwa ingoma efanayo okutsho ukuthi layo iyafa. Imbongi iphetha isigaba sayo sesibili ngokuveza sobala iqiniso ngathi uluntu ukuthi ekuzalweni lasekulaleni (ekufeni) siyalingana sonke. Kakho umuntu ongafiyo njengoba sesibonile ukuthi kufa wonke umuntu, onothileyo kanye lomyanga.
Ilombuzo omkhulu imbongi nxa ibona kunje ukuthi pho icatshe kuwuphi umgodi njengoba ibona ababusi besifa kanti labantukazana bangena mgodi munye wokufa. Akucatsheleki ukufa njengoba izikhulu labayanga benatha mthombo munye. Ukufa kugoqela zonke izizwe njalo akukhethi lokuthi unjani, ulelephi lokuthi uvela ngaphi. “Ukuthi ulelephi, njani, nini, thula ngakho wethu, ukuth’uvelaph’, ungumhlobo muni khohlw’uphinde.” Imbongi ilokhu igcizelela ukuthi impela ekulaleni siyalingana.
Ukufa lokhu kukhona kuyo yonke into ephilayo. Kube yinyamazana iyafa, loba yisibungwana bani laso siyafa. Kube ligenga bani lona elidla ukufa lalo liyafa. Kube yilezi ezindizayo, inyoni phela, lazo ziyawunonisa umhlaba ngokufa.
Ziyandiza inyoni ziphapha phezulu kodwa ekufeni kwazo ziwela phansi zibole ziwunonise umhlaba. Imbongi isitshela ukuthi singaqamba siqambe zonke izinto kodwa konke kuyakhaya linye ekufeni.
Kayizitshiyi ngaphandle imbongi ngoba ithi iyaloba sibili kodwa ekulaleni okuyikufa siyalingana.
Online Reporter