Ingozi eMabuthweni. . . Inina lihotsha i-crystal meth, limunyise usane luvuke lufile

Bongani Ndlovu

KUSEHLAKALO esidabula inhliziyo esenzakale elokitshini leMabuthweni koBulawayo, kulosane olulenyanga ezimbili luzelwe oludlule emhlabeni ngoMvulo ngemva kokumunyiswa ngunina obehotshe isidakamizwa esibizwa ngokuthi yi-crystal meth.

Amapholisa koBulawayo akuqinisekisile lokhu, ebika ukuthi inina leli lileminyaka yokuzalwa engu-22.
Kubikwa inina leli lazitika nge-crystal meth lilomunye umngane walo ngehola lesitshiya galolunye ebusuku. Lithe liqeda ukuhotsha isidakamiswa, laphatha usane lwalo, lamunyisa njengenjwayelo, basebelala.

“Umama lo wathi evuka ngehola lika-9 ekuseni, wathola ukuthi umntwana wayesethule. Lokhu kwamangalwa emapholiseni,” kutsho umsekeli wesikhulumi samapholisa koBulawayo, u-Assistant Inspector Thandekile Ndlovu.

Isidumbu sosane sihanjiswe esibhedlela se-United Bulawayo Hospitals (UBH) ukuyahlolwa.
Kulandela lesi sehlakalo, amapholisa axwayise umphakathi ngengozi zokusebenzisa izidakamizwa ezingekho emthethweni.

“Sixwayisa labo abasebenzisa izidakamizwa ukuthi abakwenzayo kudala ukuthi behluleke ukuziphatha kuhle bacine besenza ingozi. Siphinde sixwayise njalo labathengisa izidakamizwa ukuthi ingalo ende yomthetho izabafica.”