Online Reporter
Bongani Ndlovu
KULIMELE abantu abangu-14 ngoLwesine ekuseni ngesikhathi kungqikilana imitshova emibili emgwaqweni kaLuveve Road, koBulawayo.
UChief Fire Officer wakoBulawayo uMnumzana Mhlangano Moyo ubike ukuba ingozi le yenzakale duzane lendawo ebizwa kuthiwa kuseRio. Uthe izisebenzi ezibona
ngokuphepha komphakathi ziphangise zayanceda abehlelwe yingozi le.
Imitshova le iwele emasimini aseceleni kwalumgwaqo.
“Izisebenzi zethu zifike kulingozi yemitshova emibili kuLuveve Road. Izimota zombili ziphume emgwaqweni zawela emasimini omumbu. Sihambise abantu abangu-14 abalimeleyo esibhedlela seMpilo. Kulesisebenzi sekhansili yakoBulawayo ebesihlezi phambili,” kutsho uMnu Moyo.
Uthe benelise ukuthola amanye ama-ambulensi amathathu ukuthi agijimisele abalimeleyo esibhedlela.
Ukhuthaze abatshayeli ukuthi balimuke nxa besemigwaqweni, wacela lomphakathi ukuthi uhloniphe umsebenzi walabo ababona ngokuphepha kwabantu nxa kuthe kwaba lengozi enjengale.
