admin
AMAQEMBU omdlalo weTug of War kumhlubulo ongezansi yelizwe abika ukuthi azaphenduka abezintshantshu lonyaka kumncintiswano weZimbabwe International Trade Fair ozaqhutshwa ngoMgqibelo.
Umncintiswano lo uqhutshwa minyaka yonke njalo uhlawulelwa yinkampani ye-Ingwebu Breweries. Amaqembu ayedlula itshumi aphuma kuzabelo zonke zelizwe azadibana enkundleni yeZITF grounds ethokozisa uzulu ngosuku lokucina kumkhosi we- Trade Fair.
Iphephandaba likazulu kuliviki libukele amathimu la elungiselela umcimbi wokudonselana intambo, osusiba ngumncintiswano othandwa linengi lalabo abajwayele ukubukela ngesikhathi sombukiso wamabhizimusi koBulawayo.
Isikhulumi seZimbabwe Tug of War Federation uSamkeliso Dlala ubikele uMthunywa ukuthi phose wonke amathimu aselungiselele aphelela ukuthokozisa uzulu mhla welanga lomncintiswano.
“Siyathaba ukubika ukuthi amathimu azaphatheka kumncintiswano walonyaka oweZITF Tug of War asezimisele ukuthi ayencintisana,” kutsho uDladla.
Uthe kuyisifiso sabo ukuthi lonyaka kunqobe amathimu akoBulawayo ikakhulu kuhlandla labomama.
“Kungabakuhle ukuthi omama bakoBulawayo batshengisele ukuthi bayawazi umdlalo lo ngokunqoba ngoMgqibelo. Kade omama bathathelwa phansi kulumdlalo kodwa kuminyaka emithathu edluleyo, sekwaziwa ukuthi amaqembu abomama ayadonsa intambo yeTug of War njengabo baba.”
Iqembu lekhansili yakoBulawayo lona likhanya lilamathuba amahle okuhluthuna umvuzo kulo umncintiswano, selike ladlala kuhle emncintiswaneni oke waphathwa esikolo seSizane kumaviki adluleyo.
Kusenjalo, lonyaka kubikwa umvuzo wemali uphezulu, okutsho ukuba lomvuzo wabanqobi ukhweziwe.
Ingwebu Breweries ithembisa ukunikeza iqembu elizanqoba i$1 600, kubikwa abanqobi bazanikezwa i$1 100, abalandelayo baphiwa i$650. Abaqoqi bomncintiswano bathe bazanikeza njalo inkalakatha yethanka lamasese elingamalitha ayi 1 000 lezikipa.
“Umdlalo weTug of War suyaziwa njengomdlalo weTrade Fair, ngakho siyathaba ukulazisa ukuthi lonyaka ikhona futhi.
“Abadlali yibo abanikazi bamathimu.Asifuni lokubona abantu abadala bedonsana kulumncintiswano, kumele labasakhulayo bakhethwe bazibonakalise. Ukukhula komdlalo kuzenza kubelula ukuthi amanye amathimu angene emncintiswaneni lathi sikhweze inani lemivuzo,” kutsho umbiko ophuma kulinkampani.
Onompembe abajwayelekileyo kulumncintiswano bagcizelele ukuba lonyaka umthetho kuzamele uhlonitshwe.
Ukhuthaze amaqembu ukuba angene enkundleni ngesikhathi.
Imidlalo yakuqala izakuba khona ngehola lika-8 ekuseni esikolo seGifford kuthi emini kube lama-quarter final lamanye amahlandla.
Amaqembu andise ukuhlupha aze ayefika kuma-final abalisa iHow Mine, iZiscosteel, Ingwebu, leMutare Board and Timber.
Online Reporter