admin
Ethel Ncube
SEZIKHULULEKILE izakhamizi zeSilobela ngemva kokubanjwa kwenhlathu ebisiziqedele inkukhu kanye lembuzi zabo.
Inhlathu le ebisithwalise izakhamizi amagabha avuzayo ibanjwe kumaviki amabili edluleyo ethangweni ngama-ranger isuka komunye umuzi. Inyoka le okubikwa binde okwe- 3.8 metres ubusudle izifuyo zabantu abanengi kulindawo. Ekhuluma loMthunywa induna yakulesisigaba uCyprian Malisa iveze ukuba umhambaphansi lo ubusubhubhisile emhlubulweni lo. “Inyoka le ibisilesikhathi isona njalo kubonakala umzila wayo kuphela yona ingabonakali.
Amazinyane, inkukhu lengalukhuni besekuphelile kuginywa yinyoka le.
“Mina ngezwa sengifonelwa ngagijimela khona ngafonela abogatsha olubona ngenyamazana zendle ukuthi babuye ngoba ngisesabela ukuba abantu bazagcwala baminyane njengoba kulomkhuhlane weCovid 19.” kutsho uMnu uMalisa.
Uqhubekele phambili eveza ukuba linyoka ngesikhathi itholakala yayidlule komunye umuzi isekela indlu lapho abalala khona.
“Kwabayinhlanhla ukuba yadlula belele njalo ayizange ingene endlini, yayizabenzela okunye.
“Ukudlula kwayo yikho okwenza yabanjwa ngoba kwalondwa umzila yayatholakala ethangweni eduze khonapho. Ngifika kwakungayisumuntu abantu sebegcwele lezingondo lemikhonto befuna ukuyibulala.
“Amaranger ahle afika ayibamba ngezandla abanye baqaleka lezigodo zabo lokhu kusenzakala ngoba bengakaze bakubone lokhu.
“Ngithanda ukubonga ama-ranger eKwekwe asukumela phezulu ngesikhathi sifuna usizo lwabo lezakhamizi ezancedisa ekulondeni umzila wenyoka le.” kuphetha induna uMalisa
Online Reporter