admin
Intatheli kaMthunywa
KULOMAKOROKOZA weHope Fountain okubikwa ubhadale izakhamizi zakule indawo azithole ezitolo ama$5 ethi ziphume esitolo athenge ngoba engafuni ukuthelelwa igcikwane leCorona, uMthunywa uyakuveza lokhu lamhlanje.
Umakorokoza lo, okutholakale ukuthi nguZulu nje kuphela kubikwa njalo ngosuku lokuqala lokuvinjwa kwabantu ezindlini okwensuku ezingu-21 wathi esuka koBulawayo wabhadalela umtshova wonke ngoba engafuni ukuhamba labantu abanengi ethi bazamthelela umkhuhlane weCovid-19.
Kubikwa wathi efika eHope Fountain wabhadala njalo abantu ababesezitolo amaRTGS$5 ethi kabaphume bonke asale ethenga eyedwa.
Ekhuluma lentatheli kaMthunywa uMnumzana Bandile Khabo omunye walabo abanikwa leyomali uthe lokhe engelankani ngesenzo sikaZulu.
“UZulu wagada esuka koBulawayo wabhadalela abantu abangu-8 emtshoveni ngoba engafuni ukuminyana labantu phakathi ethi bazamthelela i-igcikwane leCorona.
“UZulu wayegqoke le-mask uthe efika ezitolo wathi abantu bonke abasesitolo kabaphume ukuze athange kuhle engathelelwa igcikwane leCorona njalo uzababhadala ama$5 bangaphuma.
“Izakhamizi sezizwe imali zahle zatshiya ukuthenga zamvulela wangena ziphuma zaziqhutshelwa ama$5,” kulandisa uMnu Khabo.
Kubikwa indlamanzi ezazisesitolo esithengisa utshwala lazo zisizwa lokhu zagijima zifuna ukunikwa imali ukuze zithenge utshwala.
“Abotshwala wathi esebabonile wathi uzaqala abatshaye ukuze abanike imali lakanye bavuma,” kuchaza uMnu Khabo.
Kubikwa eqeda lapho wazingenela esitolo waqala ukuzibhodela ethatha isikhathi sakhe.
Online Reporter