admin
Angisazithandi ezemacansini
Umbuzo
KHULU ngilabantwana abathathu lomkami. Uhlupho engilalo ngolokuthi mina angisazithandi ezemacansini. Kusukela ngabeletha umntwana wesibili vele sengiphongukwenzela ukusuthisa umkami kodwa mina angifuni eqinisweni. Linganginceda Khulu lingitshele ukuthi ngingenzani ukuthi ngibe njengabanye omama ngoba mina vele angikuthakazeleli ukuhlangana lomkami.
Impendulo
Nansi indaba ntombi yami. Akulalutho olutsha zonke izinto zindala. Okukhulumayo kutsha kuwe ngoba uyaqalisa ukukuzwa. Into enjalo ibangwa yikuthi: Indoda yakho yakhupha yini inkomo yohlanga? Yaqeda yini ukukulobola?
Yakhupha yini ingxenye yamalobolo? Umama wakho nguye okuzalayo yini? Indaba le ilele khonapho. Ijaha lakho nxa lingalobolanga kalikhuphe inkomo yohlanga okuthiwa yinkomo kamama. Nxa kuyikuthi umama okuzalayo sowatshona noma wahamba lelizwe awumazi lapho akhona wasusondliwa yizihlobo zadla amalobolo akho kabakhuphe inkomo yokhalo lukamama wakho. Leyonkomo bayinike udadewabo kamama wakho nxa sewatshona. Nxa kuyimali ithathe indawo yenkomo. Wena ngokwakho ubusuthenga intandela emhlophe ube uyigqoka kumbe uyithandele kwesinye isikhathi. Leso yisikhulula khalo.
Into le ekuhluphayo inzima kakhulu nxa uhlezi labantu abangakholwayo ukuthi ikhona imimoya ephatha isiko labantu. Kube yinhlanhla ukuthi uzele ngoba ngokuma kwalo umumo bekumele ube yinyumba. Yikho nje uthe usuzele wasukhineka kumizwa yakho yanqundeka uthando. This is African science which most people do not believe in. Bekezela uthathe lelinyathelo engilitshoyo. Noma kuyikuthi walotsholwa kwaphela, inkomo yohlanga kayizange ikhutshwe kuhle, abazange bamnike owayefanele ukuphiwa baphongukuhlanganisa. Isiko liyakhala lithi ukhalo lwami ke. Ubulawa yikuthi kakuzange kulandelwe isiko ekwendeni kwakho.
Ufuna isithembo kodwa wesaba unina
Umbuzo
Khulu ngingumama oleminyaka engu-29. Angendanga. Ngithandana lomunye ubaba othetheyo. Uhlupho engilalo yikuthi ubaba lo uyesaba ukuzongibona nxa unina ekhona. Bengicela ukubuza ukuthi kungabe kulothando yini Khulu kumbe ngizichithela isikhathi. Wayethe ufuna ukuthatha isithembu. Ngicela ungeluleke Khulu ngoba isikhathi siyahamba.
Impendulo
Ngiyabonga mzukulu wami. Uthando lukhona kodwa ngolokweboleka. Indoda yakho le yakhuluma kubi ilonina bachothoza isithembo bebabili lonina. Kanti indoda yiyo ethembuzayo hatshi unina. Ngitsho ukuthi indoda yakho yenza isifungo yavumelana lonina othi isithembo kasifuni.
Sekumficile okwafica abanye abalesithembu. Sekumkhathaza ukuthi uzaxakulula njani ayekuxoxa lonina. Khangela khathesi ijaha lakho selisesaba unina ingathi lithembuzela yena. Kanti umsebenzi kamama ngowokwamukela omalukazana abalethwa ngekhaya. Into engalamula le inkinga yikuthi umzalele umntwana. Umntwana ozamzala laye nguye ozakuba ngusodombo ozaqeda yonke le inkinga. Akusizi ukuthi wena udlulele phambili. Indlulela phambili le iyingozi ilanyulwa kuphela yikuthi uhlale lendoda yakho lomntwana. Indaba ekhona la indoda yakho le funa ilobuqili obuthize obokuthi wena uyaziwa ngumkayo. Yena wasekuceba emfazini wakhe, umkakhe wasecela ukuthi uninazala wakhe amvikele. Nxa uzamzalela umntwana nguye ozalamula konke lokhu. Nxa ungazithwala abadala bangakini bathumele abantu bayebika isisu ngakibo laye ekhona kuzabonakala ukuthi bayakufuna kumbe hatshi. Umuntu ongakufuniyo ngunyanewenu. Umuntu ozakuthanda ngunyokozala esebona umntwana. Indaba enjalo iqedwa njalo. Nxa okulempondo sekwembuliwe emgodleni kuzabonakala onguye kanye okuhlukuluzayo. Umendo uyasetshenzelwa awubalekelwa. Yenza njalo ntombi yami.
Abazali bami kabafuni
mkhwenyana ongasonti lathi
Umbuzo
Linjani Khulu. Ngilejaha engithandana lalo kodwa uhlupho yikuthi abazali bami bathi kumele ngithathwe ngumuntu esisonta sonke. Mina ngileminyaka engu-25 njalo ngiyakholwa ukuthi sengimtholile usofa silahlane wami. Ngenzeni ukuthi abazali bami bamukele ijaha lami ngoba bathi ngingaqali ukuletha umuntu esingela kholo olufananayo? Nceda Khulu angifuni ukwehlukana lesithandwa sami.
Impendulo
Ngiyakhathazeka mzukulu nxa ngifunda amazwi owakhulumayo. Ukukhomba lokuthathana kwalezi izikhathi yilokhu, umuntu uthandana lomuntu osemhlabeni ahlala kuwo, ngakho into le kufanele ikukhathaze. Kuyinto enzima kakhulu ukuzibophela ejaheni elilokholo lwesonto lona lingelathando ngentombi elikhonza layo. Pho ngisapota wena, akulunganga ukuzibophela emuntwini ongelathando kuwe. Lokhu kucina amajaha lezintombi sezonto efanayo besehlukana ngoba behlanganiswe lukholo lwenkonzo kanti-ke abantu bahlanganiswa luthando lokuzwanana. Mzukulu ungamekeli usofa silahlane wakho ngoba uthando yikufa silahlane hatshi ukufa silahlane.Zama njalo ukucela uncedo kugogo kanye lobabakazi wakho.
Online Reporter