adminPumulani Mpofu
UKUHLALISANA kuyinto enhle kakhulu njalo kuyaqinisa ubuhlobo. Esintwini ubuhlobo siyabuqathekisa kakhulu njalo sandise ukubana sihlale sivakatshelana ukuze abantwana labazukulu bethu bahlale besazana kusenzelwa kusasa ukuthi bakwazi ukuthi baqonde ngaphi lapho sebehlangana lenhlupho ezithize. Izihlobo yizo ezilakho ukukusiza ezindabeni ezifana lokuthathwa kwencwadi zokuzalwa.
Izihlobo zethu yizo njalo ezisala zisigcina lapho sesitshiywe ngabazali bethu loba sesibhekane lenhlupho ezingaphezu kwamandla ethu. Kukho konke esihlangana lakho empilweni kuqakathekile ukubana sikhulise ubuhlobo njalo sihlale sivakatshelana ngazo zonke insuku ukuze sibekwazi lapho esingadingana khona lapho sokuvuke indaba ezidinga izihlobo.
Kule iviki ngithole ithuba lokuxoxisana lenkazana eleminyaka elitshumi lasikhombisa ebizwa ngokuthiwa nguSihle Moyo. USihle uhlala elokitshini leMagwegwe njalo uhlala lomzawakhe. USihle wazalelwa elizweni leMzansi Africa elaziwa ngokuthi yiGoli njalo ulayo i-health card yakhe.
Unina wasuka wabhubha khonale eGoli wasebuya-ke wazobekwa lapha koBulawayo. Incwadi zokufa zikanina zabuya zonke. USihle wayevele engathathelwanga incwadi yokuzalwa ngunina. USihle wafunda esebenzisa incwadi yomunye umntwana waze wafika esibangeni sokubana abhale imihloliso yikho lapho ehluleka ukubana abhale.
Wazama ukuthi athathe incwadi yokuzalwa kodwa kwabanzima ngoba engelalo ulwazi lokubana engaqala njani ukuze ayithole leyoncwadi.
USihle wasuka-ke weza eTrinity Project ezodinga usizo lokubana athole incwadi yokuzalwa ukuze laye aqhubekele phambili ngezifundo zakhe njalo enelise ukubana alungisele ikusasa lakhe elihle.
I-Trinity yameluleka waqala wadinga unina omncane owayezamsiza ukubana athole incwadi yokuzalwa.
Njengenhlanganiso yeTrinity Project satshayela unina omncane ucingo simchazela ukubana nguye olelungelo lokuthathisa umntakadadewabo incwadi yokuzalwa njalo nguye olobuhlobo obuseduze obungasoze buhluphe nxa sokuthathwa incwadi yokuzalwa.
Wabuya-ke unina omncane ngelanga elilandelayo samchazela kabanzi ngokubana kwenziwani ukuze atholele umtakadadewabo ilungelo lakhe lokwaziwa, njalo kwakufanele abelemali engange $55 ukuze bayithathe leyoncwadi yokuzalwa. Kwakufuneka njalo incwadi evela esikolo eveza ukubana uSihle wafunda engelayo incwadi yokuzalwa kanye lencwadi yokufa kukanina.
USihle lonina omncane benelisa ukubana bathole incwadi yokufa kukaNakaSihle, i-health card, incwadi yokuzalwa kanye lesithupha sikanina omncane kodwa imali yabehlula.
ITrinity yamphathisa-ke ngemali engange $50 ukuze enelise ukubana athole incwadi yokuzalwa. Bahamba ke emahofisini kaHulumende bafika benza njengoba bebikelwe benelisa ukubana bathathe-ke incwadi yokuzalwa kaSihle. Njengoba lezincwadi zilungiswa eHarare zithatha amaviki ayisithupha ukuze zilunge njalo zizofika koBulawayo. Ingaphuma incwadi yokuzalwa sezathatha ke isithupha njalo enelise ukubana abhale imihloliso ukuze abe lekusasa elihle. Zihlobo akulandaba eyehlulayo, woza eTrinity sincedisane ukuze sizuze amalungelo ethu.
Kasihlanganeni kuviki ezayo.
Umlobi utholakala kukheli ethi [email protected] loba kunombolo ezithi 0773165055. Laku www.trinityproject.biz
Online Reporter