admin
Umbuzo
NGINGUDADE ole-26 years, lonana olenyanga ezinhlanu njalo ngihlala lobaba wengane. Nansi inkinga ngiyamthanda ngenhliziyo yami yonke kodwa Khulu nxa kumele senze ucansi angisela mizwa. Ngiyabe ngingafuni kwezinye izikhathi kodwa ngicina ngizibamba ngamandla ngizizwa ukuthi angikholisi. Sokulamaviki amabili ngifaka i-pad ngimtshele ukuthi ngisesikhathini. Kuyini inkinga Khulu ngoba ubaba uzacina esiyaphandle ngibhekile? Siza, ngenzeni?
Impendulo
Ubaba yena ulemizwa yini? Useke wakhalaza ukuthi akakuzwa kuhle na? Iqiniso lithi nxa engelansolo ngalokho umyeni wakho esizwa kungelamehluko kutsho ukuthi usesebuthakathaka ngenxa yokubeletha. Umzimba wakho kawukabuthi uhlangane. Nxa umngane wakho ekholisa iba esimeni sokukholisa lawe ungaze wafuna ukukholisa wena ugula. Kudala mzukulu umntwana wakuqala wawumbelethela ngakini ngenhloso yokuthi unyoko akuphe izihlahla zokuqinisa umzimba. Kodwa ungaze wephuka umoya kuyaphela ubudlezane bungedlula.
Kafuni ukuthi ngitshaye umntwana
Umbuzo
Angazi kumbe ngiyaphambisa nceda bo Khulu. Umkami kafuni umntwana athintwe ule-2 years. Pho ngimfundise njani nxa esithi angawona engatshywa? Mina ngilomntwana, yena uyaqala ukuzala. Khulu uhlala njalonje efuna ukungitshaya nxa ngingakhuza umntwana uthi ngiyamhlukuluza kanti umntwana wakhona kezwa njalo uyadedesa. Khulu ngimtshele njani umkami ngokuqakatheka kokufundisa umntwana esesemncane?
Impendulo
Ungakhulumi lomkakho, lungisa umntwana. Umbambe ngoswazi kakhulu, umtshele ukuthi angifuni utshele ubaba ungenza njalo ngizakuphinda. Angakucebela kubaba wale wena uthi ngithe ngizamtshaya yena uthi ngimtshayile. Ungazoneli umntwana. Umntwana lo kakafiki kusibanga sokuthi alixabanise. Umlamulankunzi luswazi, angithi lawe ngumntanakho.
Umbuzo
Khulu inyawo zami ziyafutha, ziyatshisa. Ngingumama oleminyaka engu-37 njalo ngiweya 98kg. Ngicela lingincedise.
Impendulo
Usubuye kuhle mama, nansi impendulo. Lokhu kutsho ukuthi inyawo zakho zisindwa ngumzimba wakho. Inyawo zakho zifuna ukuthi uzithobe ngamanzi akhudumalayo. Nxa uzithoba ubandezele ilembu usiyaphezulu, ungaphongu kuzithoba uhlikihla kuphela. Phathisa igazi liqanse ube usuzama ukuthi ungandisi ukudla inyama yenkomo. Kungangcono udle eyenkukhu lenhlanzi, ube usunatha i-2 litres zamanzi akhudumalayo ngelanga. Wehlukane letiye lama-drinks ngoba aletshukela eliyingozi enyaweni zakho. Zama ngamandla wonke ukuthi ungandisi ukudla inyama elamafutha, zama futhi ukuhlambulula igazi lakho lesisu sakho ngayo yonke imithi enjengentolwane. Ubuqatha bakho akusicala, yindalo lendabuko yomuntu. Kulabantu abaqatha ngokudalwa labantu ababizwa ngokuthi zintombi zomdlunkulu.
Sengifuna ubambo lwami
Umbuzo
Khulu kunjani? Ngileminyaka engu-50 yokuzalwa ngafelwa ngubaba wabantwabami eminyakeni engu-10 edluleyo. Umkami ngimzilele. Sengifuna ukuthi ngabe ngiyathola umuntu wokuthi siphile sonke manje angithandi ukuthi ngithandane lomuntu othetheyo. Khulu ngingenza njani ukuthi ngibekwazi ukuthi lo ngumuntu ongifaneleyo. Lokhe ngabhujelwa angikaze ngithandane lomuntu ongubaba. Abantwana sebelemizi yabo bonke.
Impendulo
Into yile mama wami, umuntu ongubaba ozisondeza phansi kwakho qala umbuze ukuthi ulomfazi yini noma wake wathatha nxa wake wabalomfazi labantwana bangaphi labo bantu khathesi. Angakutshela iqiniso lakhe leminyaka yakhe angaze aba ngumuntu oleminyaka emilutshwana kuleyakho. Kumele abe ngusowenu noma abemdala kancane kulawe.
Online Reporter