admin
Ngiyindoda ngebhulugwe
Umbuzo
NGIYALIBINGELELA kunhlupho zalamuhla. Mina bakithi ngithwele nzima kakhulu. Ngiyindoda eleminyaka engu-35 yokuzalwa uhlupho lwami yilolu ngiyindoda ngebhulugwe ngoba ihloka alisagamuli umkhuhlane lo sengiphile lawo okweminyaka emibili. Kudala ngizama ebantwini kwehlula angazi ukuthi ngenzeni ngicela usizo kuwe khulu ngoba sengithwele nzima ngokuba yisilima sendoda ngapha ngilomfazi labantwana. Impendulo ngomusa langothando khulu. Ngiyabonga.
Impendulo
Ngiyaphila loba ngikhathazekile ngesimo okuso. Zama ngamandla onke ukuthi wehlukane lokudla okulamafutha. Ukudla okunambithekayo nxa kuyinyama dlana inyama engakhanzingangwa layo ibenlutshwana. Uxwaye ukunatha kakhulu itiye elochago, uzincitshe ukudla okumnandi udle okokusutha ntambama kodwa emini hatshi lamasi ungadli. Okunye ongakwenza yikuthi wenze ama-exercises nsukuzonke ekuseni kungakuphathisa kakhulu ukuthi umzimba wakho wehle.
Ngitshaya one round kuphela
Umbuzo
Khulu mina ngilijaha ngilohlupho lokuya emacansini. Ngihamba kanye okwesibili kuyala nginceda.
Impendulo
Mzukulu okunye kwakuthande ukuthi sikhulume sikhangelene, ngoba singakuthi bhadla khonapha ebandla siyabe sesincede abanengi kukanti bona kabazange babe lesibindi sokubuza. Kuthi ngakolunye uhlangothi ngiyabe sengifundise abelaphi abangaziyo ngemithi bacine besiyagweba abanye abantu ngayo.
Iqiniso yikuthi kuyelapheka lokhu mzukulu. Ngamafitshane ngingathi gabha ngabantwana besithundo ubagxobagxobe, ubakhudumeze ubusunatha nxa amanzi eseqanda ngendlela yokugabha ubusuthatha amahlamvu omsuzwane uwakhudumeze ndawonye lentolwane ubusuwacenga ngelembu. Uthathe iphakethi lochago ulisike ngesigelo ekhoneni ukhuphe uchago lonke ubusunyomula umlomo we-ball pen ubophele ipheni engaselamlomo wokubhala uhotshe ngayo umuthi lo. Ubusuziphozisa ulele ngeqolo kuzaphuma amatheketheke yiwo abangela lesisidina olaso.
Ziphiwa bani induku zemuli
Umbuzo
Ngiyindoda eleminyaka engu-60 yokuzalwa. Kumuli yangakithi sazalwa saba ngabafana abahlanu lamantombazana amane. Mina yimi ijaha lesine kungakho abathathu laba bedlula kwasala mina lomnawami. Besihlezi kuhle njalo labafazi babanewethu besibakhangela. Esasikuthatha kibo zinduku sizipha obabomncane sisithi yibo asebengobaba. Umthetho wakithi uthi induku ziphiwa obaba hatshi abantwana. Uhlupho ke khathesi yikuthi ngamangala umnawami esesithi sihlangane njengemuli induku lezi ziphiwe bona labantwana ngoba mina kangifuni kuzithatha. Khulu kithi akuvunyelwa ukuthi induku zihlale labantwana thina obaba sisaphila. Nginceda Khulu ukuthi ngithini ngomnwawami ngalokhu asekucabangile.
Impendulo
Iqiniso yileli mzukulu, njengokukhuluma kwakho kutsho ukuthi wena usuphuzile kakhulu ukuqoqa imuli kayihlo ukhulume ngale indaba. Yikho umnawakho sebemtshelile abafazi babafowenu ukuthi sebekhathele yikulinda oluvela kuwe mayelana lalindaba baze bayiphosela kumnawabo ngoba kulisiko khonokho. Ukuthi wena ukhulume ngale indaba ubakhulule abafazi babafowenu ngoba ngabantu. Nxa bengahlala bengakhululwanga uzathi engathi bayaphuma bengena usubasola. Wena nika ithuba lokukhuluma ngenduku lezo, ongafuniyo ayekele. Lawe ongafuniyo ukhulume ukuthi awukwenelisi lokho uzakuzwa abantu sebezithi uyindoda emadodeni ngoba umuzi uwumise ngendlela elenkululeko. Xolisa umnawakho liyilungise lindaba uzamangala esesithi yena kalantonga ayifunayo, kodwa akudingayo yikuthi umuzi ukhululeke.
Online Reporter