admin
Samkelo Tshuma
UMCULI ocathulayo kodwa oselodumo eMajahundeni, eGwanda uFredrick Moyo owaziwa kwezomculo ngokuthi nguZhezhingtonz usekhuphe ividiyo entsha yengoma yakhe ethi, Wena wami.
UZhezhingtonz ungene kwezomculo kuwonalo umnyaka njalo upheke idlalade elilengoma ezingu-11 lanxa esenelise ukwenza ividiyo yengoma eyodwa.
Ekhuluma loMthunywa uZhezhingtonz uveze ukuthi inhloso yakhe ngokukhipha ividiyo yikuthi aziwe ngumphakathi.
“Ngingene kunkundla yokuzithokozisa lonyaka njalo ividiyo ngiyenzele ukuthi ngaziwe kundawana zonke ikakhulu lapho ebengingaziwa khona,” kutsho uZhezhingtonz.
Umhlabeleli lo kukhanya uleziphiwo ezinengi nanko phela ungumlobi wemidlalo elingiswa ezikolo njalo ungumlingisi futhi.
“Sengibhale imidlalo emithathu eyasetshenziswa eCollen Bawn High School, emibili yakhona yenza benelisa ukuyafika kumincintiswano yeSabelo.
“Omunye wathola imendulo ye-bronze. Ukulingisa kumidlalo ngakuqala ngisafunda njalo ngenelisa ukuthola isicoco sokuba yintshantshu,” kutsho uZhezhingtonz.
Uphethe ngokuthembisa abalandeli ukuthi kusiyafika uMpalakazi uzabe esekhiphe njalo elinye idlalade elitsha ngakho bahlale bethiye indlebe.
Online Reporter