Inhlupho zalamuhla: Umkami akazali usefuna ngikhuleliswe ngenye indoda

NGINGOWESIFAZANE oleminyaka eyisikhombisa etshadileyo.

Sonke lesi sikhathi besizama ukuthola abantwana. Ngomnyaka odluleyo sithole ukuthi umkami nguye olenkinga yokungabatholi abantwana.

Udokotela wethu wasinika imithi okumele ayinathe ukuze sisizakale.

Umkami kasayinathi imithi ayinikwayo, uthi ngidinge loba ngubani owesilisa ozangikhulelisa ukuze abantu bazitshele ukuthi ngikhuleliswe nguye.

Bengithi uyadlala kodwa ngiyabona ukuthi uzimisele ngento ayitshoyo.

Ngenzenjani? Kambe ukukhuleliswa ngenye indoda kuzawakha umuzi wethu na?

Impendulo:
Ukuthola abantwana akukho ezandleni zomuntu kodwa kuyintando kaNkulunkulu. Ngitsho kungathiwa ufuna kanjani ukujabulisa umkakho kodwa ungalinge uvume ukukhuleliswa ngomunye umuntu wesilisa ukujabulisa yena.

Uzakwenza njani uma selithola owenu umntwana ngemva kwesikhathi?

Uzacina ekusola ngokuvuma ukukhuleliswa ngomunye umuntu.

Umntwana uyofika uma kudaliwe ukuthi libe ngabazali.

Uma kungenzeki lokho lingadinga umntwana kwabeSocial Welfare ukuze lithole umntwana ongasi wenu elingamkhulisa abe ngowenu okuyinto ejwayelekileyo ebantwini abatshadileyo abalenkinga yokuthola abantwana. Hlalani ethembeni.