admin
Umbuzo
NGIYINDODA eleminyaka engu-30 ngilonkosikazi engihlala laye kodwa kangaziwa ngakibo. Uhlupho engilalo yikuthi Khulu ngingathi ngifuna ukuyavela ngakibo uyangibuza ukuthi ngilemalini abesesithi incinyane kakhulu leyomali. Ngenzeni Khulu kunzima ukugcina imali, mina bengifisa ukuthi ngihambise leyo engilayo ngibe sengibuyela ngingathola enye. Ngicebisa Khulu ngoba kangifuni ukuthi ngihlale lomuntu ngingaziwa ngakibo.
Impendulo
Ukuhlala lomntanomuntu ungaziwa ngakibo yikumumatha inkalakatha yengozi enzima kakhulu, kuyabe kulefu elimnyama elizulazulayo phezulu ekhanda nje mzukulu ngoba lumuntu ohlezi laye engagula uzambika ngaphi njalo kobani futhi ufike uthi wena ungubani wangaphi njalo otheni. Isintu siyakuveza ukuba umkhwenyana yinxoza nje, kungakho kutsho ukuba ukukhupha imali kwabozala akupheli. Kungakho-ke, kuhle ukuba ukhulume lezihlobo zakhe eziseduze okungaba ngodadewabo kumbe obabakazi ubabonise ukuba wena uphetheni njalo ufuna ukuyaziveza kwabozala. Khulumisanani uhambise lokhu okuphetheyo ngoba awuyi thenga kodwa uyacela ubuhlobo.
Usefuna sihlangane emacansini
Umbuzo
Khulu ngilejaha elingihlupha nsuku zonke ngokufuna ukuya emacansini lami. Mina ngileminyaka engu-21 yokuzalwa njalo ngazithembisa ukuthi ngizahlangana emacansini mhla ngitshada kodwa umfana lo usengihluphile. Ukumthanda ngiyamthanda kodwa ngicela izeluleko khulu. Ngingamtshela njani ukuthi azwisise ukuthi mina ngifuna ukulindela ilanga lethu lomtshado.
Impendulo
Lowo jaha akayethethela abakibo abonge kakhulu ngoba akuvamanga ngensuku zanamuhla ukuhlangana lentombi nto sibili.Hlala laye phansi umchasisele ngesifiso sakho, njalo umbonise ukuba uma engumuntu oqotho akangagijimeli ukuya emacansini kalinde usuku lomtshado wenu. Kungenzeka ukuba yena vele akalandaba lomtshado kodwa udinga ukudlala ngawe akwenyelise umoya wakho nje. Zama ngamandla wonke ukufela eqinisweni njalo lakundlela okholelwa kiyo ngobuntombi bakho. Ungavumi ukulahla ubuntombi bakho ngokufuna ukujabulisa umuntu nje. Uthando oluqotho luyabekezela, aluzenzisi njalo aluhlukumezi futhi alukhahlamezi, nxa selukhahlameza lufuna amacansi isikhathi singakafiki, hatshi asithando lolu. Bekezelani bazukulu lilungise ilanga lenu lomtshado hatshi ukuphanga ucansi.
Ngiyehluleka ukuzibika entombini
Umbuzo
Ngilijaha elileminyaka yokuzalwa engu-18. Khulu udubo nantu, ngilenhloni okokuthi ngiyehluleka ukuzibika entombini. Ukhona untombazana esengimbonile, angilali ngaye Khulu kodwa udubo yikuthi angenelisi ukuthi ngimtshele ngalokhu. Ngingambona lokumbingelela ngiyehluleka, ngizizwa ngiginqa izandla lamakhwapha, amadolo la exega ngingavele ngimbone.
Impendulo
Kudala lekweluseni ayekhona amajaha anjengawe, lawo-ke ayehamba ayekhonjiselwa intombi ngodadewabo umtshado uze ucine usiba khona sibili. Lawe akuzame ukubeka isibindi njengendoda umtshele luntombazana ngesifiso sakho sonke. Ungaba lakho ukuthuma umgane wakhe ahambe ayekuxhoxhozela umfula ngobhulo wena uthi usulandela indlela isivuliwe. Manje ungehluleka okulula kangaka mzukulu pho ucansi uzamkwanisa kumbe uzalambisa umntanabantu nje inyawo zisemanzini.Ngilethemba ungabalakho ukuxoxisana lomngane wakhe, ulakho ukuba akungenise enjanjini lawe ucine usiba lesabelo. Okunye ungaba lakho ukususa udaba lwakho ngocingo nje kuphela, wena uzathi ususiya indlela iyabe isivulekile. Ngabe uthe ungumuntu wensonto bengizathi dinga abadala bebandla balihlanganise kulokhu okufisayo.
Umalukazana wami ulivila
Umbuzo
Khulu ngabanjwa ngamandla ukuthi ngihlale lendodana yami, umalukazana kanye labantwabayo ababili ngesikhathi umntanami engasebenzi. Khathesi usesebenza kodwa kabasafuni ukusuka endlini yami. Umalukazana wami ulivila elehluleka ngitsho lokuzenwaya, ukugqoka lakho kakwazi ngitsho. Ugqoka impahla ezimfitshane, nxa zizinde umzimba wonke uyabe uphandle ngangizwe Khulu bethi ngama-see through. Khulu sengike ngazama ukukhuluma labo ngakho kodwa kukhanya akula mehluko oba khona. Khulu angazi ukuthi ngithini kodwa ngicela uncedo lwakho.
Impendulo
Ngabe kusemakhaya ngabe ngithi vukela kosobhuku uyemthululela uhlupho lwakho lonke kodwa kulapha emadolobheni lapho umlamlankunzi olidale lika mantshi. Hamba emthethwandaba uyebalandisela ngohlupho lwakho bazaba lendlela abaluhluza ngalo njalo babanike lendlela yokuba baphume endlini yakho bakutshiye uzihlalele wena. Indlela abantwana balamuhla abaziphatha ngayo ayihambelani layizolo. Kungakho-ke kuqakathekile ukuba bayekuba lowabo umuzi kude le lapho elizabe livakatshelana khona. Umthethwandaba ulakho ukukuphathisa sibili.
Online Reporter