admin
MUMIRIRI weBuhera South mudare reNational Assembly, Cde Joseph Chinotimba, vanoti vakaona manenji apo vaive panhamo yemunhu akange afa achirumwa nerovambira, mushure mekunge parufu rwake pauya dzimwe nyoka mbiri dzerudzi urwu.
Izvi zvinonzi zvakaitika parufu rwaTsumbei Chingwa (36), mubhuku raChikware, uyo akafa arumwa nerovambira. Cde Chinotimba vanoti ivo nevamwe vaive parufu apa vakapera mate mukanwa nekuda kwemashura aya.
“Ndaivapo panhamo iyi, idunhu randinomirira uye padyo zvikuru nepamba pangu. Amai ava vakafa mushure mekunge varumwa nenyoka, panhamo pavo pakazouya nyoka dzemarovambira.
“Hamheno kuti chii asi inyaya yakavhundutsa vanhu zvikuru,” vanodaro Cde Chinotimba.
Mudunhu iri ndimo zvakare mune imwe nyaya yakamboitika nguva yadarika, yebere rinonzi rakasvika panhamo rikasvikobvoronga vaichema pamwe nekuruma vamwe vanhu vaivepo. Bere iri rakazouraiwa nechaunga chaive parufu urwu.
“Ini senhengo yedare reParamende, ndakangobatsirawo panhamo iyi nezvimwe zvaidiwa asi chokwadi nyaya yakaitika iyi inoshamisa,” vanodaro Cde Chinotimba.
Vanoti mudzimai uyu asati arumwa nenyoka, munzvimbo iyi makaitikazve dambudziko guru remapere ayo mamwe acho anonzi akazouraiwa nevagari veko uye aifamba pamadiro zuva rakacheka nyika.
Online Reporter