Vusumuzi Dube
Obey Sibanda
KULENINA elileminyaka engu-32 yokuzalwa, elizalwa eMberengwa, elibonga amadlozi akwabo kulandela ukuhlinzwa ngodokotela esibhedlela seMpilo likhitshwe inkalakatha yenyama elesisindo se-50kg esiswini.
Inina leli, uMelody Ndlovu uveze ukuba ube yinhlekisa emphakathini wakwabo, nanko “isisu besiqhubeka sikhula” sengathi ngumuntu ozithweleyo okweminyaka emihlanu kodwa singabelethwa.
Uthe ubephakathi kobuhlungu obumangalisayo lokweyiswa.
UNdlovu uthe ukweqa ukungena esikhathini kwaba yikuqala kohlupho lwakhe. “Nganginakana ukuthi sengizithwele njengoba ngeqa ukungena esikhathini. Kodwa iminyaka ize yaba mihlanu, ngilokhu ngibuthwele ubunzima, besengisehluleka lokuhamba kunye lokwenza eminye imisebenzi eyenziwa ngabesifazana.
“Ngahamba esibhedlela ngayahlolwa, kodwa kabazange babone lutho. Kodwa inyama le yaqhubeka ikhula, ngabuyela ngayangeniswa emtshineni futhi ngasengibikelwa ukuthi ngilenyama ezikhulayo phakathi ama-fibroids, basebengidlulisela esibhedlela se-United Bulawayo Hospitals ukuze ngiyekhangelisiswa ngodokotela,” kutsho uNdlovu echasisa ngobunzima akade ephakathi kwabo.
Uthe e-UBH, wahlangana lobunzima obukhulu bokuswelakala kwemali yokuyahlolwa ngomtshina ozimeleyo okwabangela ukuthi ayedinga usizo kubelaphi bomdabuko. Ngeshwa, imizamo yabo ayizange isebenze, njalo inyama le yaqhubeka ikhula, yacina isilesisindo esethusayo esingamakhilogilamu angamatshumi amahlanu.
Uthe isimo lesi yiso esenza amalunga emuli yakhe amusa esibhedlela seMpilo.
“Umsebenzi wokuhlinza bekuyinto enzima kakhulu, ngoba inyama le ibisigxile kakhulu futhi sihlale ngendlela exakayo ezithweni eziqakathekileyo, okugoqela isibeletho lamathumbu, njalo siseduze le-diaphragm.
UDokotela u-Elton Sengurai ongomunye obehlinza uNkszn Ndlovu uthe, “Eminyakeni yami yomsebenzi, angikaze ngibone inyama ekhula emzimbeni engaka. Ukuyikhupha bekudinga ubungcitshi babodokotela abehlukeneyo.”
“Siyikhiphe kuhle njalo uNkszn Ndlovu usesimeni esiphephileyo. Inyama le ebikhula ibiphambanisa izitho zakhe zangaphakathi zomzimba okwenze kwabanzima ukumhlinza.”
Isikhulumi sesibhedlela seMpilo, uNkosikazi Noma Mabhena, uncome iqembu labodokotela ngomsebenzi omuhle kakhulu abawenzileyo waphinda wakhuthaza izigulane ukuthi zidinge uncedo lwezempilakahle masinyane nxa zibona izimpawu zokuthi kaziphilanga.
“Kuqakathekile ukuthi izigulane zivakatshele isibhedlela masinyane ukuze zithole ukunakekelwa ngesikhathi kungakabi lenkinga,” utsho egcizelela.
“Isibhedlela seMpilo ngesomphakathi esisiza umuntu wonke kungakhathalekile ukuba ulemali kumbe hatshi.”
Online Reporter