adminCornelius Luphahla
KWENZAKALE insindabaphenduli yendaba esigabeni seMatshakayile eLupane lapho elinye inina eligamule elinye ikhanda ngesikela bebanga utshani.
Impi le yenzakale ngoMgqibelo kuviki ephelileyo lapho uNkosazana Zanele Mafu ogamule khona uNkosikazi Lindiwe Nkomo ekhanda ethi kungani esika utshani esihotsheni sakhe engamphanga imvumo.
UMthunywa ukhulumisane loNkosazana Princess Moyo onguye owalamula impi le wathi uNkszn Mafu wahlasela uMaNkomo ngesikhathi sebeqedile ukusika utshani sebesidla umphako.
“Sathi siqeda ukusika utshani sahlala phansi sadla inkobe esasizithwele. Sithe sisadla uMafu waqala ukutshingela uMaNkomo ethi usikelani utshani endaweni yakhe. Mina ngathi mhlawumbe bayakhuluma njengoba sisike saze saqeda bengaxabananga.
“Ngasuka ngayathatha isithungo sami ngisithi sesihamba ngathola uMafu segamule uMaNkomo ngesikela emtshaya ngafika ngalamula. Ngathi ngibuza ukuthi babangani wathi umtshayela ukuthi kungani esika esihotsheni sakhe,” kutsho uNkszn Moyo.
UNkszn Sandile Mabhena ongumntakaNkszn Nkomo ubikele intatheli ukuthi uzwa ubuhlungu ngokuganyulwa kukanina ngoba bathwala nzima sebemusa esibhedlela.
“Mina ngizwa ubuhlungu kakhulu ngesenzo esenziwa nguMafu esokugamula umama ngesikela. Lokhu kwasihlupha kakhulu njengemuli sesimusa esibhedlela eSt Luke’s ngoba kukhatshana kakhulu ngakho salahlekelwa yimali enengi sibili.
“Ngalokhu-ke uMafu usazosibhadala sibili kosobhuku noma nje umama sowaphuma esibhedlela njalo samzwela uMafu sathi angabotshwa ukuze simbhadalise imali esazikhiphayo,” kutsho uNkszn Mabhena.
Ebuzwa ngale indaba uNkkz Nkomo uthe kenelisi ukukhuluma okunengi ngoba usafuthelwa.
“Mina kangenelisi ukubalisa indaba ezinengi ngoba ngisafuthelwa kodwa ukulimala ngalimala sibili ngaganyulwa ngumakhelwane wami,” kuveza uNkkz Nkomo.
UNkszn Mafu ebuzwa ngale indaba uvumile ukuthi yenzakala wathi kakwazi ukuthi wayengenwe yini ngoba babanga into encane.
“Kuliqiniso sibili ukuthi ngaxabana loMaNkomo ngamgamula ngesikela kodwa kwaba yisilingo nje kimi angazi ukuthi ngasuka ngangenwa yini ngoba sasibanga into encane kakhulu. Noma kunjalo ngaxolisa njalo lakosobhuku ngizaxolisa mhla ngithonisiswa,” kuveza uNkszn Mafu.
Online Reporter