KULENINA elileminyaka engu-45 yokuzalwa eligwetshelwe ukuginyisa umntanalo oleminyaka eyisificamunwe munye amanalithi angu-49.
UJuliet Tushabomwe oyisizalwane se-Uganda kubikwa ubebamba ngamandla umntwana womkakhe ukuthi aginye amanalithi kunye lensiba zokubhala eziqamukileyo.
Umantshi weMitooma uMnumzana Gibson Muhangi uthe inina leli liyepika iminyaka engu-49 ejele ngecala lokuhlukuluza kunye lokuzama ukubulala.
Uthe isigwebo lesi sihambelana lamanalithi awaginyisa umntwana.
Kubikwa inina leli ebelihlala esiqintini seRweibaare II eKashenshero Sub-county, esigabeni seMitooma lenza isihluku lesi emntwaneni lisola ukuthi kungani umntwana lo elokhu ekhuluma lonina omzalayo.

Indaba le, yavela egcekeni ngenyanga kaNkwenkwezi lonyaka lapho umntwana lo, aba lobuhlungu obesabekayo esiswini okwenza wahanjiswa esibhedlela wayahlolwa isisu e-Ishaka Adventist
Hospital. Ama-x-ray aveza amanalithi ayesesiswini okwenza wayahlinzwa esibhedlela seMbarara Regional Referral Hospital.
Uyise womntwana uTwinomugisha Simon, wabikela amapholisa ukuthi kulokuxabana emzini wakhe ngenxa yokuthi indodana yakhe ikhulumisana lonina.
“Umkami wayengafuni ukuthi umntanami akhulume lonina. Wayesithi ngimtshele akwekele lokhu, ngoba uzacina emxotsha,” kutsho uMnu Simon.
Ngesikhathi sokuthoniswa kwecala leli, umtshutshisi ulethe abafakazi abayisikhombisa, kanye lomamangala abaveze ukuthi inina leli laligoqela amanalithi la ngephepha lithi kawaginye.
Umsolwa uwalandule amacala la, ethi umfana lo engabe waginya amanalithi la evakatshe komakhelwane. Kodwa umantshi ukulandule lokhu wamthola elecala.
Isigwebo lesi senze amalunga emuli le, ehlisa iphika, elinye ilunga lathi kuyadingeka ukuba abantwana abangahlali labazali babo ababazalayo bavikelwe.
“Umfana lo ubesenza yonke imisebenzi ngekhaya, kodwa ubemfuna efile. Sicela uhulumende asincedise kubanjwe abanye abesifazana abahlukuluza abantwana babomkabo. Inina leli akumelanga liphinde livunyelwe emphakathini, kumele lifele ejele,” kutsho uEunice Birungi. Ubuye wacela abakhokheli bomdabu kunye lohulumende ukuthi bathathe amanyathelo ngabantu abahlukuluza abantwana. —Ubulembu