Online Reporter
YiNtatheli kaMthunywa
KULENDODA yeGlen Norah, eHarare egwazwe yafa ngumkayo ekuseni ngosuku lweKhisimusi kulandela ukuxabana kubangwa ukuphuza ukupheka.
Umuyi uLevy Mautsa, obengumtshayeli womtshova ufe kulandela ukugwazwa amahlandla amanengi ngesikhathi exabana lomkakhe ngosuku olwandulela olweKhisimusi.
Amapholisa aqinisekise ngesehlakalo lesi, njalo abuye aveza ukuthi umetheswacala kakabotshwa ulokhu edingwa.
Isikhulumi samapholisa eHarare, uInspector Luckmore Chakanza uthe ingxabano yaqala ngokuzonda kukaMautsa efica ukudla kungakaphekwa.
Kuvele ukuthi osengumuyi kunye lomkakhe baxabana kubangwa ukuphuza ukupheka. Kucatshangelwa ukuthi uMautsa waqala ukutshaya umkakhe ngamampama wabuye wabulala lomakhalekhukhwini wakhe.
Umakhelwane uBlessing Chengeti wazama ukulamula ababili laba phakathi kwamabili ngemva kokuba sebesuke endlini yabo baya duzane lomnyango wakhe.
Kubikwa basuka babuyela endlini yabo kungathi sebekhumisene umlotha ngemva kwesikhathi, babuye baqala futhi ukuxabana.
U-Inspector Chakanza uthe ngemva kwesikhathi umkaMautsa wafonela omunye osebenza lomkakhe wamazisa ukuthi uxabane lomkakhe.
Wabuye waveza ukuthi ugwaze umkakhe kathathu ngegqamu yemkulwini wabuye wakhuthaza umngane lo ukuthi ayemkhangela.
Umetheswacala kaziwa lapho akhona njalo uyadingwa ngamapholisa.
Isidumbu sikaMautsa besilamanxeba atshonayo amathathu ehlombe, entanyeni kunye lemhlane.
Ingqamu okucatshangelwa ukuba yiyo eyasetshenziswa ukudala icala leli yatholakala esivandeni phandle.
Isidumbu sasiwa emotsha yesibhedlela seSally Mugabe Central Hospital lapho esilindele ukuhlolwa imbangela yokufa.
Amapholisa acela ongabe esazi lapho okulometheswacala khona ukuthi azise amapholisa ukuze abotshwe.
