Online Reporter
YiNtatheli kaMthunywa
KULENDODA eleminyaka engu-43 emiswe emthethwandaba ngoMvulo ikhangelane lecala lokubulala ngemva kokusolwa ngokugwaza owesifazane kanengi ekhanda, ebusweni lentanyeni ngengqamu kanye lembodlela yotshwala efileyo ngaphambi kokumtshontshela umakhalekhukhwini.
U-Obvious Moyo, ongelandawo yokuhlala kodwa ovela esigabeni seBubi, uvele phambi kukamantshi weWestern Commonage uMnumzana Jeconia Prince Ncube, ekhangelane lecala lokubulala. Umsolwa uzabuye abuye emthethwandaba mhlaka 2 Mpalakazi.
Umtshutshisi uMnumzana Tafara Dzimbanhete utshele inkundla ukuthi mhlaka 10 Lwezi, uSibongile Beverly Ngwenya (34), osedlule emhlabeni, wayenatha utshwala lo-Irene Ndlovu phakathi e-Asikweledisi Sports Bar ePumula Old Shopping Centre.
Ngehola lika 11.30 PM, uNgwenya watshiya u-Irene enatha. Inkundla izwe ukuthi phakathi kwamabili, u-Irene waqalisa ukudinga uNgwenya ukuze babambisane indlela babuyele emakhaya bonke. Wamfica emi lomsolwa, bemi ngaphandle kwe Asikweledisi Sports Bar.
Luyaqhubeka udaba ebulenjini
U-Irene wabalanda wababikela uNgwenya ukuthi usefuna ukuhamba njalo abesifazana laba bavumelana ukuthi bahambe bonke, kutsho uMnu Dzimbanhete. UNgwenya wacina ukubonakala lomsolwa njalo bobabili batshiya u-Irene eduze Lalapho ahlala khona.
UMoyo wasuka lapho waphelekezela owehlelelwe yingozi, ethi uhlose ukumtshiya endlini yakhe ngaphambi kokuthi aye eRobert Sinyoka Village, lapho ayethi uhlala khona.
Kuthe befika ku-9283/2 e-Old Pumula, umsolwa wadobha imbodlela yotshwala efileyo wagwaza uNgwenya kanengi ngayo ekhanda, ebusweni lentanyeni, wambulala khonapho. Wabuye wathatha umakhalekhukhwini wakhe wabaleka.
Ngosuku olulandelayo ekuseni, ngo-6.30 AM mhlaka 11 Lwezi, isidumbu sikaNgwenya satholwa ngamalunga omphakathi, abikela umkakhe, uMqamali Ncube. Yena owabikela amapholisa.
Isidumbu sikaNgwenya sathathwa sasiwa e-United Bulawayo Hospitals ukuyahlolwa ngodokotela.
Uphenyo olwalandelayo lwakhomba amapholisa lapho okutholwe khona izigqoko ezilegazi abezigqokile ngesikhathi esenza ubugebengu lobu, kanye legqamu ayisebenzisayo.
