Online Reporter
YiNtatheli kaMthunywa
KULEMULI yesiqintini senduna uMutasa edonselwe enkundleni kulandela ukusola elinye ilunga layo elicebileyo ngobuthakathi.
Umamangala, uPhillipa Chuma, ubikele inkundla ukuthi umbango uqale engawukhangelelanga kulandela ukufonela abemuli yangakibo kwaphenduka amazwi enzondo kanye lensolo ezitshaqisayo zivela kumzukulu wakhe, uGracious Chiuta.
“Ngeviki ephelileyo, ngafonela uyise kaGracious, oyindodana kadadewethu ongasekho emhlabeni.
UGracious waphendula ucingo, njalo esikhundleni sokuthi angibingelele, waqala ukumemeza, esithi angisiso isihlobo sakhe,” kutsho uChuma ebikela inkundla.
Ngokutsho kukaChuma, insolo lezi zaqina.
“Wathi ngingumthakathi, njalo kangisi gogo wakhe, ngimthakathile ukuze aphenduke ekhaya evela eDurban, lapho abehlala khona,” kutsho uChuma.
UChuma uthe amazwi la amethusa ngoba kakaze alimaze loba athakathe muntu.
Uthe wazisa umnewabo ngesehlakalo lesi, njalo ubaba kaGracious wamfonela ebhula umlilo.
Kodwa isimo sabuye saba sibi, uGracious esehluthunele uyise ucingo waqala ukumthethisa futhi.
“UGracious wathatha ucingo wangibiza ngobuthakathi. Ngalesosikhathi ngabona ukuthi lokhu kwasekungeyisikho ukungazwisisani,” kutsho uChuma, esengeza ukuthi abadala bazame ukulungisa indaba njengemuli, kodwa kwehlula.
“Sizamile ukukhulumisana njengomdeni, kodwa uGracious lemuli yangakibo bala ukuhlangana lathi.
Yikho silapha lamuhla.”
UGracious, uphikile ukuthi wasola uChuma ngobuthakathi, esithi ukuxabana kuphathwe ngalindlela ukuze abe ngumuntu omubi.
“Angizange ngimbize ngobuthakathi. Eqinisweni, nguye ongibiza ngomthakathi,” kutsho uGracious.
Uchaze ukuthi uphendule ucingo lukayise ngenhlonipho, kodwa wahlangabezana lenzondo.
“Ngambingelela, kodwa yena kazange angiphendule kuhle, wangisola ngokuthi ngisabalalisa amahemuhemu okuthi ungumthakathi.”
“Uthe ngitshele udadewethu uPrecious ukuthi ungumthakathi,” kutsho uGracious, egcizelela ukuthi kazange akwenze lokho.
Kodwa inkundla ize yezwa ubufakazi obuveza ukuthi uGracious nguye othi uChuma ngumthakathi kweyinye i-audio elethwe njengobufakazi enkundleni.
Ubufakazi lobu butshintshe isimo enkundleni.
Umfowabo kaChuma, uMillicent Chiuta, utshele induna uMutasa ukuthi udadewabo uPhillipa uhlaselwa ngenxa yomhawu kanye lenzondo osokulesikhathi eside kukhona.“Bathi udadewethu uPhillipa nguye imbangela yenhlupho zonke zemuli yabo. Kabakhulumisani, njalo bathi nguye obenza bangendi,” kutsho uMillicent.
Uthe ukusolwa lokhu akulamsebenzi lobuthakathi, kodwa ngumhawu.
“Balomhawu ngoba udadewethu lomkakhe bayaphumelela. Yikho ngilethe umdeni wonke lapha,” kutsho yena.
“Imuli iyamzonda ngoba umkakhe uyazisebenzela kwamanye amazwe. Kulenzondo phakathi kukaChuma kanye lomdeni wonke,” kutsho yena, esengeza ukuthi ufuna indaba ivezwe sobala ukuze kubonakale ukuthi udadewabo umsulwa.
“Ngabuza uGracious ukuthi kungani esola ugogo wakhe ngobuthakathi, njalo waxolisa, esithi wayethukuthele,” kutsho uMillicent, esola uGracious ngokuthi uqamba amanga phambi kwenkundla.
Umka-Chuma, uPetros Chuma, laye ulandule ukuthi umkakhe ngumthakathi wachasisa ngomthombo wemali yabo.
“Siphila kuhle ngoba ngingumtshayeli wamagonyethi. Kungumsebenzi olukhuni, kayisibo buthakathi,” kutsho uPetros.
“Angikaze ngizwe ngokuthi umkami ngumthakathi kusukela sitshada. Konke lokhu ngamanga.”
Induna uMutasa itshengise ukukhathazeka ngalokhu yabuye yaxwayisa ukuthi ingxabano ezinje ziyaxabanisa izimuli.
“Abantwana laba akumelanga bangenele izindaba zabazali babo. Abazali lezihlobo eziseduze kumele zibe yinto eqakathekileyo kubo, hatshi ukuthi baphathwe njengezitha,” kutsho induna uMutasa. Ukhuthaze umdeni ukuthi ufake phambili ukubambana lenhlonipho, wabuye waxwayisa ngokuvumela umhawu ukuthi ukhokhele izenzo zabo.
“Ukuba lenotho akusicala. Awungeke uthi umuntu ngumthakathi ngoba nje uphila impilo engcono kuleyakho,” kutsho induna uMutasa andubana ithi imuli le iye komunye usiyazi.
