Online Reporter
Nkosilathi Sibanda
KULENINA leSpitzkop eGwanda elithoba amanxeba okungqikilwa ngezibhakela ngumyeni walo, kulandela ukwala ukuthi ifeze isifiso sendoda le, sokuthi ithathe unkosikazi wesibili.
Kubikwa mhlaka 22 Ncwabakazi lonyaka, ngehola lesitshiya galolunye ebusuku, kwaba lokungezwani phakathi kwalaba ababili ngodaba lwesithembu. Inina kalizange livume, isenzo esacunula umkakhe oleminyaka yokuzalwa engu-43.
Ngemva kwamalanga amabili, lwavuka njalo udaba, kodwa inina laqhubeka lisala. Akuhlalanga isikhathi, khonapho nje, indoda yaqala ukwethesa unkosikazi wayo icala lokuthi kasakhonzi, qede lapho yamdinda ngezibhakela emzimbeni wonke. Waphinda wamgongoda ngensimbi ekhanda, kwaba yinhlanhla inina lenelisa ukucela ezinyaweni, layabikela amapholisa.
Inina leli lalimala amehlo, lavuvuka ikhanda.
INational Prosecuting Authority of Zimbabwe ibike ukuba indoda le, imiswe emthethwandaba, isetheswa icala lokuhlukumeza umkalo njalo itholakale ilecala yanikwa isigwebo sokuyapika inyanga eziyisitshiya galombili. Kwesulwa inyanga ezimbili, kukhangelelwe ukuthi kuminyaka emihlanu ezayo angadali icala elifanayo, kukanti uzasebenzela umphakathi okwamahola angu-210.
